Albistea entzun

Koronabirusa

Araba, Gasteiz eta beste 25 udalerri perimetralki itxiko dituzte gaurtik aurrera

Ostalariek auzitara joko dute, barruko jarduera mugatuta izango dutelako eremu gorriko herrietan. Madrilek ez du maiatzaren 9tik aurrera luzatuko alarma egoera
Herritar batzuk, Gasteizko taberna bateko terrazan, astelehenean.
Herritar batzuk, Gasteizko taberna bateko terrazan, astelehenean. DAVID AGUILAR / EFE Tamaina handiagoan ikusi

Edurne Begiristain -

2021eko apirilak 7

EAEko Plan Zibilaren Aholku Batzordeak (Labi) martxoaren 26an erabaki zuen Aste Santuko jaiegunak igaro arte ez zuela berrituko kasuen intzidentzia tasa handiarengatik itxi beharreko tokien zerrenda, eta hala egin zuen atzo: guztira 26 udalerri itxi beharko dituzte gaurtik aurrera. Besteak beste, Araba eta Gasteiz sartu dira eremu gorrian, eta bietan itxiera perimetrala ezarriko dute gaur. Araba eta Gasteiz konfinamendu perimetrala duten lurralde eta hiriburu bakarrak dira. Horietaz gainera, beste 25 udalerri konfinatuko dituzte, azken hamalau egunetan 100.000 biztanleko 400eko intzidentzia tasa gainditu dutelako. Araban, hiriburua ez ezik, Eltziego, Iruña Oka, Bastida eta Legutio ere itxiko dituzte. Bizkaian, Berriatua, Berriz, Ermua, Ondarroa eta Zaldibar daude egoera horretan. Gipuzkoan, berriz, Arrasate, Beasain, Idiazabal, Lazkao, Legazpi, Lezo, Oiartzun, Ordizia, Ormaiztegi, Oñati, Segura, Tolosa, Urretxu, Zaldibia, Zegama eta Zumarraga.

Toki horietan guztietan aparteko neurriak ezarri beharko dituzte: ezin da atera baimen berezirik gabe, eta ostatuek barruko jarduera mugatua izan beharko dute 06:30etik 09:30era eta 13:00etatik 16:00etara. Hala ere, dagoeneko ostalarien elkarteek aurreratu dute helegitea aurkeztuko dutela datozen egunetan EAEko Justizia Auzitegi Nagusian. Haien arabera, ostalariengan eragin zuzena duen erabaki hau ez da «egokia» izurritea kontrolatzeko, eta uste dute ez duela «oinarri nahikorik». Gainera, toki itxietako kirol jarduerak gehienez lauko taldeetan egin ahal izango dira, eta kirol instalazioetako aldagelak eta dutxak itxita egongo dira, igerilekuetan izan ezik.

Ia toki denetan ari da malkartzen kutsatuen malda, eta agintariak behin eta berriz ari dira arduraz jokatzeko mezuak bidaltzen. Iñigo Urkullu Eusko Jaurlaritzako lehendakariak ohartarazi du pandemiaren amaiera «gero eta gertuago» dagoela eta «azken ahalegina» egiteko eskatu die herritarrei. Antzera mintzatu da Bingen Zupiria Eusko Jaurlaritzako bozeramailea ere. Futbol ospakizunen harira sortutako jende pilaketak hizpide hartuta, azpimarratu du «norberaren konpromisorik ezean» oso zaila izango dela horrelako egoerak eragoztea.

Nafarroako Gobernuak, berriz, gaur berrikusiko ditu Aste Santuari begira hartutako neurri murriztaileak. Printzipioz, etzi arte daude indarrean ostalaritzari eta bilerei eragiten dizkieten neurriak.

Bien bitartean, Hego Euskal Herriko administrazioak bizkortzen ari dira txertaketa kanpaina. Eusko Jaurlaritzako eta Nafarroako Gobernuko osasun agintariek emandako datuen arabera, orain arte 584.804 dosi jarri dira Hegoaldean. Osakidetzak 469.000 dosi jaso ditu, eta horietatik 450.000 jarri ditu. Gotzone Sagardui Eusko Jaurlaritzako Osasun sailburuak jakinarazi du iritsi diren txerto guztien %95 jarri dituela, stock txiki bat gordeta —Espainiako Osasun Ministerioaren datuen arabera, ordea, jasotako dosien %79 jarri ditu Osakidetzak, 370.000 inguru—. Jaurlaritzak Modernaren 18.000 dosi gehiago jasoko ditu aste honetan, eta AstraZenecaren beste bidalketa bat hila amaitu baino lehen.

Nafarroako Gobernuak, berriz, 23.000 pertsona txertatu nahi ditu aste honetan. Maria Txibite foru gobernuko presidenteak jakinarazi du txerto kopurua handitu egingo dela eta bigarren hiruhilekoan txertaketaren erritmoa «hirukoiztu» egingo dela.

Alarma egoeraren bukaera

Pedro Sanchez Espainiako Gobernuko presidenteak atzo iragarri zuen ez duela alarma egoera maiatzaren 9tik aurrera luzatzeko asmorik. «Txertaketak pandemiari erantzuteko nahikoa tresna eskainiko dizkigu». Udarako, herritarren %70 immunizatuta egotea espero du.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Subillan egin nahi zuten gasa ustiatzeko proiektua. Artxiboko irudi batean, lursail horietako bat. ©JAIZKI FONTANEDA / FOKU

Eusko Jaurlaritzak uko egin dio Armentia II-n gasa ustiatzeari

Jon Ordoñez Garmendia - Jone Bastida Alzuru - Lander Muñagorri Garmendia

Ohar batean azaldu duenez, Klima Aldaketaren eta Trantsizio Energetikoaren lege proiektua onartu ondoren, «ez du zentzurik». EH Bilduk eta Elkarrekin Podemosek esan dute albiste pozgarria dela

 ©Iñigo Uriz / Foku

Positibo datuek okerrera egin dute: beste 1.142 kasu atzeman dituzte

Jone Bastida Alzuru

Otsailaren 5etik erregistratu den daturik okerrena da. Positibo tasak ere gora egin du: %8,86

Astra Zenecaren txerto dosiak. ©LESZEK SZYMANSKI / EFE

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Edurne Begiristain

Informazio osagarria