Europride

Duela berrogei urteko Stonewalleko kontakizun ofizialak urteetan kontatu du matxinada maskulino, gay eta zuria izan zela, baina, Sylvia Rivera edota Marsha P. Johnson bezalako parte hartzaile askok azaleratu zutenez, trans, beltz eta hispano asko izan ziren tartean, alboratzen diren disidente sexualak. Riverak eta Johnsonek 1970eko hamarkadan maiz salatu zuten «gay, zuri, gazte, guapo eta liberatuen kluba».

Berrogei urtean gauzak asko aldatu dira, baina ez nahi bezainbeste. Harro mugimenduak egin du oharra: Europride jaialdia Bilbora ekartzeko arriskua dagoela-eta, halako jaiek LGTB mugimenduaren despolitizazioa eta merkantilizazioa dakartzatela, eta parte jakin batengana bideratzen dituztela: alegia, gizon zuri eta botere ekonomikoa dutenengana. Esanguratsua da Ortzadar dela antolaketan parte hartzea erabaki duen talde bakarra.

Baina indarkeriak egunerokoa izaten jarraitzen du arautik ateratzen direnentzat; gorroto krimenak pairatzeko arriskua pil-pilean dago, eta jaiok zuritu besterik ez dute egiten mugimendua, ukatu hainbat errealitate daudela.

Harro plataformaren ustez, baina, jaiok badute zerbait ona: erresistentziak eta aliantzak sortzen dira patriarkatuaren, arrazakeriaren, kapitalismoaren eta sistema zapaltzaileen kontra ari direnekin. Horren isla izan zen atzoko Bilboko manifestazioa.