HIZPIDEAK

Abuztu aurreratua

Amagoia Mujika Tolaretxipi -

2019ko ekainak 16
Hitza bete du PSNk». Horixe txio batean Maria Txibitek atzo esan zuena: «Boto bat bera ere ez NA+-ri, ezta Bilduri ere. Aukera egon den lekuetan akordio aurrerakoiak erraztuz, eta eskuinaren eta subiranismoaren alternatiba gisara proposatuz. Beti taldeen erabakiak errespetatuz». Beste garai bati buruz ariko balitz bezala da txio hori, eta ez atzokoaz, hauxe izan baita haren apustu aurrerakoi eta zintzoa: Barañain, Burlata, Berriobeiti edota Lizarrako alkatetzak Navarra Sumari ahalbidetzea, deliberoz boterea eskuinari emanez, beste aukera batzuk zeuden lekuetan.

PSOEk lehenagotik ere ohituak gauzkan jokaleku batera eraman du Nafarroa: NaBai, PSN eta IUren gobernua galarazi eta Miguel Sanzen UPN hobetsi zuen 2007ko garaira: Nafarroa urteetako erregimenera kondenatu zuen abuztuko kolpe hartara; edo 2014an PSNk Yolanda Barcinari jarri asmo zion zentsura mozioa geldiarazi zuenera.

Alderdi abertzaleei ohar argia heldu zaie: abuztua aurreratu dutela udaletan, lau urteetan PSNk Navarra Sumarekin akordioak eginez gidatuko dituztela, eta jokaldi hori bera izan litekeela lasai asko Nafarroako Legebiltzarra osatzerakoan. «PSN kanpora», oihukatu zuten atzo herritarrek Iruñeko udaletxearen plazan. Sozialisten balizko bazkideek eta babesleek kontuan hartu beharrekoa.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna