Aukerak

Boris Johnsonek Eskoziako emaitzak ezagutu bezperan eman zuen erantzuna. «Ez da momentua herria zatikatzeko». Esana du ezduela erreferendumik onartuko, eta, gainera, ezin besterik espero Ingalaterran kontserbadoreen garaipen arrakastatsua erdietsi berri duenarengandik, baina «ez da momentua» esateak eman dezake aukerarik geroagorako? Egoera ahalik eta gehien luzatuko du Johnsonek, besteak beste brexit-ak Eskozian sortu duen atsekabea denborak apalduko duelakoan. Independentistak 2011ko kopuru bertsuetan daude, baina Johnsonek ez du nahi David Cameronek abiatu zuen gisako abenturarik.

SNPk, gehiengo osotik oso gertu, garaipen historikoa lortu du, eta erreferendumak zilegitasun osoa izaten jarraitzen du, alderdi independentistek gehiengo osoa baitute. Halaxe agindu zuen atzo Nicola Sturgeonek: pandemia gainditu ostean helduko diote erreferendumari.

Prozesuak, ordea, luzeegi jo lezakeepaitegietan, aldebakarreko bidea baztertuta. Eskoziako Parlamentuak erreferenduma egiteko legea onartuko balu, Erresuma Batuak helegitea jarriko lioke Auzitegi Gorenean, eta auzitegiak erabakiko luke Holyroodek eskumenik baduen erreferenduma egiteko. Ezezkoa aukera bat da, baina independentziarako gogoa are gehiago susper dezake, eta urrundu dagoeneko urrunegi daudenak. Londresek ere aukera gutxi du.