Bizitza delitu

Carola Racketeri laguntza eman beharrean, haren ausardia eta gizatasuna txalotu beharrean, atxilotu egin dute. Mediterraneoan jasotako 40 migratzaile Lampedusan lehorreratzeko baimena ukatu zioten Italiako agintariek, baina erreskatatutakoen egoera ikusita, Sea Watch 3 erreskate ontzia porturatzea erabaki zuen. Sekulakoa da Racketeri leporatzen dioten delitu sorta —itsas patruilaren ontzia abordatzen saiatzea barne— eta sekulakoa da jaso dezakeen zigorra.

Racketeren mezuek eta ekintzek aurrez aurre izan dute Matteo Salvini Italiako Barne ministroa. Arrazoiak badaude Salvini larrutzeko, errua hari egozteko. Erruaren zati handiena, ordea, ez da Salvinirena, migratzaileei laguntza ukatu dien Europako agintariena baizik, Mediterraneoan laguntza ontziak jarri eta lagundu beharrean, zaintza ontzien alde egin zutenena; nori eta Libiari migratzaileen erreskateen ardura eman ziotenena. Haberik edo adreilurik jarri gabe Trumpena baino horma gaindiezinagoa eraiki dutenena.

Europako agintarientzat hildakoak ez dira hain hildako pobreziatik, jazarpenetik eta gerratik ihesi Mediterraneoak irensten baditu edo Afrikako basamorturen batean betirako galtzen badira. Europako agintariak aspaldi konturatu ziren jasan dezaketela noizean behin Alan Kurdi berriren baten argazkiak sortutako haserre eta harrabots igarokorra. Europako agintariek delitu bihurtu dute bizitzak salbatzea.