Literaturaren muina

Album ilustratu mutua da, tamaina ertainekoa (29x23 cm), 40 orrialde hartzen dituzten 20 ilustrazioz osatua.

Irakurketa maila desberdinak ditu, jolas literario sinpleenetatik hausnarketa mamitsuetara.

Ilustrazioen kolore paleta nagusia berde-urdina da, pintzelarekin landua gehienbat, eta bi (zenbaitetan hiru) margo esku dituena. Nagusitasun hotz horren gainean horia, gorria eta zuria erabiltzen dira kontrasterako. Atzealdeetako kolore masak ez dira uniformeak, tonalitate desberdineko zertzeladak agertzen dira han-hemen, estetikoak ez diren funtzio gehigarriekin; mugimendua, formen nabarmentzea eta sekuentzien kateamendua, kasurako.

Gure alter ego-a haur bat da, bidea eginez oihanean aurrera doana, norabait.

Oinarrizko irakurketa jolasa da: segidako orrialdean zein pertsonaia topatuko duen asmatzea proposatzen diguna, ahal den neurrian, dena gidatzen duen logika antzemateko.

Amaierak ezustekoa du, bigarren hausnarketa maila sakonagoetara joateko giltzarri.