1937tik gaur arteko emakume errepresaliatuak omendu ditu Sarek

Apirilaren 26an, asteazkenez, Gernikako Bonbardaketaren 86. urteurrena izango da, eta, horren harira, 1937tik gaur arte «era batean edo bestean, gatazkaren ondorioz errepresaliatuak izan diren emakumeak» omendu ditu Sare Herritarrak, Gernika-Lumon (Bizkaia). Ikonoaren herriko eta ingurukoetako alabei jarri die arreta Sarek, 1937-2023 Emakumearen gatazka, erradiografia bat obra egiteko.

Atzo plazaratu zuten askotariko errepresioak jasandako emakumeak protagonista dituen azterlana, eta Gernikan barna ibilbide bat egin zuten hari loturik. 90 bat emakumeren istorioak dokumentatu dituzte, baina uste dute gehiago direla ebakuatutakoak, erbesteratuak edota gatibu egon direnak urte askoan. «Izan dadila urrats bat emakume horiei guztiei dagokien aitortzan, baina ez azkena», esan zuten elkarteko ordezkariek.

Oroimen ibilbideak hiru gune izan zituen: Merkurio plaza, Domingo Alegria plaza eta Udal plaza. lehenean, bertsoak bota zituen Onintza Enbeitak; bigarrenean, Oihana Garmendia preso ohiak Kattalin Minerren Turista klasea eleberriaren pasarte bat irakurri zuen; eta, azken gunean, Gernikako Sare Feministak mugimenduko bi kide aritu ziren, eta Enbatako beste bi kidek Miren Azkarateren Ikusezinak obraren pasarte bat irakurri zuten.

Ibilbidearen amaieran denen argazkia atera zuten, Maitane Azurmendi artistak egindako marrazkiarekin. Bakearen museoan den argazkiaren gainean marrazkia egin du Azurmendik 1937-2023 Emakumearen gatazka, erradiografia bat obraren azal gisa; emakumeak ezkutuan islatzen ditu argazki horrek. Amaitzerako, plaka bat jarri zuten plazan, eta erantsi emakume errepresaliatuak gogoratzeko dela.

Egitarau luzea

Gernikako Bonbardaketaren urtemugaren inguruko egitarau zabala egiten ari dira egunotan. Besteak beste, gaur, Larraitz Zuazoren Gernika bizirik bideoklipa aurkeztuko dute, eta, bihar, 36ko gerrako gudariei omenaldia egingo die Gernikako Udalak; kultura eta bakearen jardunaldiak ere bihar hasiko dira.

Bonbardaketaren egunean, apirilaren 26an, Gernika garretan kale antzerkia egingo dute,21:00etan, eta, orduerdi geroago, herritarrek ibilbide bat egingo dute kandelekin. Datorren larunbatera arte aurrera egingo dute urteurren tragikoarekin lotutako ekitaldiek, eta, esaterako, ostegunean, elkarretaratze antimilitarista bat egingo dute Merkurio plazan (19:00). La SAPA de los Aperribay. La guerra empieza aquí liburua ere aurkeztuko dute egun horretan. Larunbatean, azkenik, bisita gidatua egingo dute Astrako bunkerrera, eta sirenak joko du.