Albistea entzun

ARKUPEAN

Entretenimendu Saila

Xabier Paya Ruiz -

2017ko irailak 26

Hego Euskal Herriko Jaurlaritza bateratuaren gobernuek gero eta gutxiago irauten zuten XXI. mende bukaeran. Gero eta alderdi gehiagok parte hartzen zuten gobernu-itunetan, eta bakoitzak hedabideetan saldutako promesak kosta ahala kosta sartu nahi izaten zituen legealdi berriko programan. Inkoherentzia eta kontraesanez betetako Frankenstein haiek gizaldi hasierako egonkortasun-akordioak oroitarazten zituzten, bai batzuek, bai besteek, elkarrekin eraikitzeko planak baino gehiago, elkarri ez erasotzeko paktuak ematen baitzuten. Kontua da urte hartako Euskal-nafar Autonomia Erkidegoko hauteskundeen emaitzak berrikuntza deigarria ekarri zuela: Entretenimendu Saila.

Ohiko 11 sailburuen ordez, lehendakari-andereak ezkerreko alderdi txiki baten baldintza bakarra onartu eta ordura arteko futbol taldeari dozenarako falta zitzaion alea erantsi zion: Entretenimendu sailburua. Twitterreko hamar letraguneko mezuen jarioak polemika luzea eratu zuen, lanorduetako txiolarien eta desorduetako trollen entretenigarri; Amets Arzallusek BERRIAko eguneroko bizpahiru zutabe eskaini zizkion gaiari, eta EITBko tertulietan gobernuzaleek erabakiaren gakoak filtratu zituzten. Ziotenez, Kultura Sailaren mesedetan hartutako neurria zen, azken hamarkadetan edozein gisatako jardueren zaku bihurtuta baitzegoen gobernu atala. Herritar askoren begietan, kulturako aurrekontuak errege hanpurutsuaren fabulako soinekoaren bertsio berritua ziren: bakoitzak bere neurriko xingolak eta botoiak ikusten zituen, eta ea zein ausartzen zen aldamenekoari argitzen larunbat goiz hartako ingurumenari buruzko hitzaldia edo igande eguerdiko ardo dastaketa ez zirela kultura. Gastronomia pentsamendu horren janzki gorena zen: nola ez ziren kultura izango Alfred Hitchcockek Donostian jan zituen txipiroiak, nola ez ziren kultura izango mende hasierako Game of Thrones telesail antologikoko aktoreek Bilbon jandako pintxoak, nola ez ziren kultura izango edozein herritako jaietako paella edo tortilla lehiaketak?

Gogoan ditut lehenbiziko prentsaurrekoan gobernuaren bozeramaileak egindako adierazpenak kultura eta entretenimendua bereizteko: «Gastronomia oro ez da kultura, baina kultura erraz uler daiteke jatearekin alderatuta: ahoratzen dugunak ez badu nutrienterik, sabela entretenitu baino ez dugu egingo; platerekoak gorputza elikatzen duen bezala, kultur sorkuntzak adimena elikatzen badu, kitzikatzen, xaxatzen, hunkitzen, astintzen... orduan bada kultura». «Eta orduan zer da kultura gastronomikoa?» galdetu zion asteburuetan egunkari salduenean orrialde bat zuen kazetariak: «industria». Nola bereizi kultura eta entretenimendua? Ordura arte Kultura Sailari egokitutako zenbait arlo Entretenimendu Sailera igarotzeak txio eta iruzkin uholde amaigabea piztu zuen: «Nork esango du euskal literaturako zein obra diren kultura eta zein entretenimendua?», «zortziko txikiko bertsoaldi gehienak entretenimendua dira», «ETBko programazioa errepasatuta, % 3 da kultura eta % 117 entretenimendua», eta iskanbila nabarmena sortu zuen Argiako blogariaren «udako jaialdi gehienak turismoa erakartzeko xedez sortu ziren, ez bertakoon lepo gaineko goseak asetzeko; hori zer da, kultura edo entretenimendua?», pesteak peste.

Zalapartak zalaparta, gobernuak aurrera egin zuen eta sail bakoitzak bere deialdiak argitaratu zituen. Sortzaile eta ekoizle pikaroenek bai Kultura bai Entretenimenduko diru-laguntzak eskatu zituzten, kontzeptuok elkarren aurkako ziren eztabaidari muzin eginda. Iritzilari ugariren harridurarako, ausart haien zenbait egitasmok baiezkoa jaso zuten alde bietan. Ahaztuko zitzaien, ziurrenik, kultur jarduerak eta eskolako irakasleak oso antzekoak direla, eta badirela aldi berean ezagutzak garuneratu eta bizipen gogoangarriak gozarazteko gai direnak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

 ©BERRIA

Garai konplexuei aurre egiteko kazetaritza bat

Beatriz Zabalondo - BERRIA Taldeko lehendakaria / Martxelo Otamendi - BERRIAko zuzendaria

Iaz BERRIA Taldeak egindakoaren errepasoa duzu hau. Kazetaritza da gure eginkizuna, euskarazko kalitateko kazetaritza; erreferente informatiboa izatea helburu. Beraz, hortik hasi dugu errepasoa, gero arlo ekonomikoari, komunitateari eta erronka berriei leku egiteko.

Irautea iraultzea denean

Estitxu Garai, Naiara Pinedo eta Zuriñe Rodriguez

Zure ahotsa errazago zapaltzea, moztea. Ostean datorren gizonak zure iritzia gutxiestea. Gizonen maiztasuna handiagoa izatea. Gizonak finkoak izatea, zu aldakorra. Mahaiko emakume bakarra izatea naturalizatzera iristea. Zure hitzei ez entzunarena egitea, beti euren artean elkarri erreferentziak egitea.

Zuretzat bihotzez, Elizabeth Hadley
Ondoeza

Kinka buletina

Klima larrialdiari eta ingurumenari buruzko azken berriak zabaltzen dituen buletina.

Iruzkinak kargatzen...