Estatu Kontseiluak aho batez onetsi du helegitea

Espainiako Gobernuak gaur bertan bilduko du Ministroen Kontseilua, eta Auzitegi Konstituzionalean inpugnazioa aurkeztuko du Kataluniako Parlamentuak astelehenean onartu zuen haustura adierazpenaren aurka. Estatu Kontseiluak, ordubete paseko bilera batean, aho batez onetsi zuen atzo Mariano Rajoyren gobernuak helegitea aurkeztea Konstituzionalean. Aholkularitza organoak ebatzi du «nahiko oinarri juridiko» badaudela Junts Pel Siko eta CUPeko diputatuen botoekin onartutako adierazpena inpugnatzeko. Espainiako Konstituzioaren 161.2 artikuluan eta Auzitegi Konstituzionaleko Lege Organikoaren 76 eta 77 artikuluetan ikusi du haustura adierazpenaren kontra egiteko euskarria Estatu Kontseiluak.

Aholkularitza organoak Konstituzionalera jotzeko bermea eman ostean, Soraya Saenz de Santamaria gobernuko presidenteordeak Estatu Idazkarien eta Idazkariordeen Batzordea bildu zuen atzo, eta, horren ostean, gaur emango dio Ministroen Kontseiluak Rajoyri oniritzia Kataluniako Errepublika sortzen hasteko urratsak zehaztu dituen adierazpenaren kontra helegitea aurkezteko.

Konstituzionalak helegitea tramiterako onartze hutsarekin —seguruenik, bihar bertan egingo du—, behin-behinean baliogabe geratuko da Kataluniako Parlamentuaren adierazpena. Bost hilabeteko epean, erabakia berretsi edo ezetsi beharko luke Konstituzionalak.

Fiskaltzak oharra mossoei

Kataluniako independentziarako prozesuan sedizio delituaren zantzurik ikusiko balute gertakariak ikertu eta salatzeko ohartarazi die Auzitegi Nazionaleko fiskalburu Javier Zaragozak Mossoei, Espainiako Poliziari eta Guardia Zibilari. Auzitegi Nazionalak ez dauka eskumenik legebiltzarkideen eta Generalitateko Gobernu Kontseiluko kideen aurka egiteko, baina bai aforatu ez diren funtzionarioen kontra. Sedizio delitua hamar-hamabost urteko espetxearekin dago zigortuta.

Kataluniako «deskonexio» prozesuari aurre egiteko orduan, Rajoyrekin bat egin du PSOEko buruzagi Pedro Sanchezek —atzo bildu ziren bigarren aldiz—, baina abenduaren 20ko bozen ostean Kataluniako agintariekin elkarrizketa bideak bilatu behar direla erantsi du. Espainiako errege Felipe Borboikoarekin ere bildu zen atzo Rajoy.