Errespetuaz

Faktoria irratsaioan Josu Goikoetxeak egiten duen Astelehen poetikoak izeneko azken tartean poeta homosexual bat hartu du hizpide, Andolin Eguzkitza, nahiz eta, Goikoetxeak berak aitortu bezala, nekez aurkitu duen haren gaytasunari erreferentzia egiten dion aipamenik, «Angel Erro, Juanjo Olasagarre eta Rikardo Arregi poeta gayen testu batzuetan izan ezik».

Aste berean Josu Goikoetxeak beste bi euskal idazleren gaineko kontu ezezagun xamarra aipatu du Twitterren, enteratu berriaren harriduraz aipatu ere: Amaia Lasa eta Joxean Artze senar-emazteak izan zirela. Txioaren erantzunetan asko dira harritu direnak (baita euskal kulturkideak ere: Irati Jimenez, Lorea Agirre, Gorka Setien, Leire Narbaiza; nik neuk ere ez nekien deus). Baten batek (Xabier Mendigurenek) jakin bai, baina publikoki inoiz aipatua ikusi ez eta errespetuz inoiz kontatu ez duela aitortu du.

«Zer urrun gauden», dio Josu Goikoetxeak, «tradizio anglosaxoitik. Haiek datu aipagarritzat joko lukete bi sortzaileen ibilbidean».

Pribatuak-edo direlakoan, ez-aipagarritzat jotzen ditugun kontu horiek (militantziak bai izaten baitira ezagunak) ongi definitzen gaituzte euskaldunok: afektibotasuna kudeatzeko ezgauza, guztietan zerebral jokatzearen jokatzeaz.