ARKUPEAN

Azpi-ordezkatuak

Elixabete Garmendia Lasa -

2019ko abenduak 8

Google-k partitzen duen albiste mazedonia zaharminduan iritsi zitzaidan hauxe telefonora, joan den astelehenean: «Piden a los vecinos de Olite que falseen conocer villancicos en euskera para grabar un programa de ETB». Alegia, euskal telebistak Erriberrin grabatuko duela gabon gauerako saioa, eta herriko udalak biztanleei dei egin diela, gabon kantak ez jakin arren ere, grabazioan egon daitezen. Agrupemos Olite-Erriberri Elkartuk gobernatzen du herria 2015etik; Maite Garbayo alkateak zabaldutako gutunean, elkarteak, merkatariak eta herritarrak oro animatzen ditu saioan parte hartzera «ikusleria oso ugariko erakusleiho horretan, herriaren idiosinkrasia islatuko delako»; eta horrek hedapena izango duelako espazio zabal batean, «hainbat autonomia-erkidegotan eta baita Euskal Herri frantsesean ere». Alkateak herriaren nortasuna azaltzeko modua ikusten duen tokian, El Español-en adarra den navarra.com-ek iruzurra ikusten du.

Coral Olitensek ETB1eko Ahotsak saioan izan berri duen arrakastak jarri du nonbait telebista Erriberrira begira. Astelehenean bertan, Sartagudako abesbatza zen lehiakideetako bat. Kantoreek ez zuten aurrera egin, makal aritu ziren, baina Sartagudako abesbatza bertako Memoriaren Parkean kantuan ikusteak zirrara eragiten zuen. (Beste mokadu bat El Español-eko haginkarientzat). Ahotsak saioak —reality show osagaiak alde batera utzita— badu azpimarratzekoa den ezaugarri bat: abesbatzen bidez, herriak erakusten ditu, pasadizoan besterik ez bada ere, eta ezagutarazten ditu herritar batzuk behintzat, taldean kantatzera zaletuak. Abesbatzak herriaren ordezkari modura jokatzen du. Asteleheneko saio horretan bertan arabarrak ziren beste bi taldeak: Zigoitiakoa bata, Erribera Beitiakoa bestea. (Eskurtsioa zor diot azken herri horri, ez baitut ezagutzen).

Kontua da herriek apenas dutela tokirik telebistan, bereziki albistegietan; ezbeharren bat gertatzen denean atera ohi dira: suteak, uholdeak, istripuak, hilketak... El Caso-ko materiala, alegia. Zorte pixka batekin, azoka famaturen bat egiten bada, orduan izango dute Telebistan aurpegi erdia behintzat erakusteko tartea herriek: Ordizia, Gernika, Ezpeleta, Agurain, Elizondo... horiek tokia ziurtatua duten klasikoetako batzuk. Eta jan kontuetatik kanpora, kulturan, salbuespenetan salbuespen, Durangoko Azoka, urtean egun jakin batzutan Guggenheim-Kursaal eta enparauen monopolioari koxka bat jateko gai.

Aurten Durangon estreinatu den liburuetako bat hauxe izan da: Ez gara neutralak. Izenburu probokatzaile horren azpian, garai bateko eliz liburuen estiloan dator esplikazioa: Argia-ren kazetaritza zenbait historia, ideia eta praktikaren bidez azaldua. Gorka Bereziartuak idatzi du liburua, Argia-ren mendeurrenari azken puntua jarriz. Argia-tik abiatuta egungo hedabide sistemaren eta kazetagintzaren analisia egiten du kazetariak, hausnarketa sozio-politikoari helduz. Eztabaidarako gai ugari eskaintzen du lanak; egileak berak aitortzen du: «Argia-n islatzen dugun Euskal Herria ez da dagoen Euskal Herri bakarra, dauden aukeren artean posible bat besterik ez». Hori onartuta, diagnostikoak ituan jotzen du hainbatetan, esaterako, honetan: «Euskal Herrian badaukagu gizarte zibil bat (...) hedabide askotan azpi-ordezkatua dagoena». Eta aurrerago: «Nahiko ziurra zera da: ordezkaritza edo suplantazioa bizibide duten agenteak egoera horrekin gustura daudela, denen izenean hitz egiteko euren planetan ez baita sartzen gizartetik bestelako ahotsak sortzea, euren kontroletik kanpo».

Herriek —eta herritarrek— telebistako albistegietan daukaten presentzia eskasa zentzu kuantitatiboan nahiz kualitatiboan- jokabide horren metaforatzat har daiteke.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Adineko batzuk paseoan, Bizkaiko zahar etxe batean. ©MARISOL RAMIREZ / FOKU

Beste 499 kasu Hegoaldean: arduraz jokatzeko eskatu dute agintariek

Olatz Esteban Ezkati

Jaurlaritzako agintariek eta hiriburuetako alkateek iragarri dute neurri zorrotzagoak hartzeko prest daudela. Arabako, Bizkaiko eta Gipuzkoako ospitaleetan ostegunean baino 30 gaixo gehiago daude

Santos Indurain kontseilaria prentaurreko batean, artxiboko irudian. ©Jesus Diges/EFE

59 kasu atzeman dituzte Nafarroan

Berria

Pertsona bat hil da azken orduetan Tuterako osasun eremuan. Nafarroako Gobernuak ez ditu neurri orokorrak ezarriko momentuz.

Nafarroako osasun langileak PCR probak egiteko prest, artxiboko irudi batean. ©Jagoba Manterola/FOKU

Oldarraldi bat atzeman dute Murillo el Fruto eta Zarrakaztelu inguruan

Berria

25 bat positibo detektatu dituzte; gehienak sasoikako langileen artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna