Albistea entzun

Koronabirusa

Legea «hobetzeko» akordioa

Elkarrekin Podemos-IUk pandemiaren aurkako legea babestuko du, EAJ eta PSE-EErekin batera. Isunak urritu eta eskubideak «blindatzeko» era egin dutela diote. EH Bildu eta PP-C's aurka daude
Iñigo Urkullu lehendakaria eta Miren Gorrotxategi Elkarrekin Podemos-IUko bozeramailea, Eusko Legebiltzarreko korridoreetan —artxiboko irudia—.
Iñigo Urkullu lehendakaria eta Miren Gorrotxategi Elkarrekin Podemos-IUko bozeramailea, Eusko Legebiltzarreko korridoreetan —artxiboko irudia—. J.R.BILBAO/ EFE Tamaina handiagoan ikusi

Edurne Begiristain -

2021eko ekainak 10

Bi aste barru onartuko du Eusko Legebiltzarrak pandemiaren aurkako legea, eta jatorrian baino babes zabalagoarekin egingo du aurrera. Izan ere, EAJk eta PSE-EEk Elkarrekin Podemos-IU taldea izango dute bidelagun lege proposamena aurrera ateratzeko. Eusko Jaurlaritza sostengatzen duten taldeek eta Elkarrekin Podemos-IUk herenegun itxi zuten lege egitasmoaren inguruko akordioa, eta, atzo, haren berri eman zuten Eusko Legebiltzarrean. Azpimarratu zuten akordioari esker «hobetu» egingo dela jatorrizko testua, eta legeak «tresna egokiagoak» eskainiko dituela birusari aurre egiteko.

Akordioaren muina bi arlotan laburbildu daiteke: batetik, «murrizketa sakonak» egin dira lege proposamenak aurreikusten dituen isunen esparruan, eta, bestetik, oinarrizko eskubideak «blindatu» egin dira. Elkarrekin Podemos-IU taldeko bozeramaile Miren Gorrotxategik emandako azalpenen arabera, koalizioaren ekarpenei esker lortu da arau hausteengatik legeak aurreikusitako isunak «nabarmen gutxitzea», eta arau hauste bera egiteagatik isun handiagorik ez jasotzea. «Pedagogiaren alde egin behar dugu, eta ez zigorraren alde». Horrez gain, esan du oinarrizko eskubideak «blindatu» egingo direla akordioari esker; beraz, alarma egoeratik kanpo ezin izango da hartu oinarrizko eskubideak murriztuko dituen neurririk, Gorrotxategik jakinarazi zuenez. «Oinarrizko eskubideak arautzerakoan, proportzionaltasuna bermatuko da, betiere txosten zientifikoetan oinarriturik». Adostutako testuak «berme» gehiago emango ditu biltzeko eskubidea edota lan egiteko eskubidea erabiltzeko.

Bestelako «gobernantza eredu» baten alde ere egingo du legeak, eta gizarte zibilaren esku zenbait tresna jarriko dira pandemia arautzen duten organoetan parte har dezan. «Adibidez, hezkuntza komunitatea erabakiguneetan egon ahalko da ikastetxeak berriz itxi behar badira», Gorrotxategiren esanetan. Lortutako akordioaren beste gakoetako bat da Eusko Jaurlaritzak aldiro azalpenak eman beharko dituela legebiltzarrean bilakaera epidemiologikoak gizartean eta ekonomian dituen ondorioen inguruan.

Akordioaren garrantzia azpimarratu zuten atzo EAJk eta PSE-EEk, eta goratu egin zuten Elkarrekin Podemos-IUk adostasunerako erakutsitako prestasuna. Javier Telleria EAJko legebiltzarkidearen ustez, lan eredu «zintzoa, arduratsua eta eraikitzailea» izan da, eta, akordioari esker, legeak «segurtasun juridiko handiagoa» izango du.

Tramitazio bidean da lege egitasmoa Eusko Legebiltzarrean, eta taldeek ekarpenak egiteko era dute oraindik, hilaren 24an osoko bilkuran behin betiko onartu aurretik. EAJk eta PSEk uste dute badela denbora oraindik akordioa beste taldeetara zabaltzeko, nahiz eta kritiko agertu ziren PP-C's-k eta Voxek agertutako jarrera «itxiarekin». EH Bilduri aurpegiratu zioten negoziatzeko borondaterik agertu ez izana, baina akordiora batzeko eskua luzatu eta ekarpenak mahai gainean jartzeko eskatu zioten.

«Aterki juridiko ahulegia»

EH Bildurentzat, ordea, «aterki juridiko ahulegia» du lortutako akordioak, eta, horregatik, 72 zuzenketa aurkeztu dizkio lege proposamenari. Koalizioak uste du «epe motzeko» begirada duela proiektuak, ez duelako neurririk planteatzen izurriaren kalte ekonomikoak eta sozialak leuntzeko, ez eta ongizate eta osasun arloko zerbitzu publikoak indartzeko ere. Horiek horrela, helburu bikoitza dute zuzenketek, Maddalen Iriartek eta Rebeka Uberak azaldu zutenez: osasun sistema publikoa «ondo egituratzea» osasun larrialdiei erantzun egokia emateko, eta herritarren «zaintza eta babesa» bermatzea. Besteak beste, EH Bilduk proposatu du Labi teknikoa organo «independente» bat izatea, askotariko alorretako teknikari eta adituek osatutakoa, eta Labiren Aholku Batzordea desagertzea.

Eskaera bera egin du PP-C's alderdiak zuzenketa batean: Labiren Aholku Batzordearen ordez, aditu independenteek osatutako batzorde bat osatzeko eskatu du. Koalizioak ehundik gora zuzenketa aurkeztu dizkio lege egitasmoari.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Herritar batzuk, maskararekin, Iruñean kalean. / ©Iñigo Uriz, Foku

Hegoaldean ez da kanpoaldean maskararik jarri beharko ekainaren 26tik aurrera

Jon Ordoñez Garmendia

Pedro Sanchez Espainiako presidenteak iragarri du neurri hori. Datorren ostegunean onartuko du Espainiako Ministro Kontseiluak ezohiko bilera batean.

Hizkuntza gutxituen esparruko ehundik gora eragilek sinatu zuten Hizkuntza Eskubideak Bermatzeko Protokoloa, 2016an, Kursaalen. ©ARITZ LOIOLA / FOKU

Sare berriak, eragiteko

Ion Orzaiz

Kontseiluak hizkuntza politikak eraldatzeko bide orria aurkeztuko du bihar. Ehun bat eragilek eta entitatek bat egin dute agirian jasotako helburuekin

Eskoriatzako Arizmendi-Almen ikastolaren eremua ur azpian, 'Goiena.eus'-ek zabalduriko bideo bateko irudian. ©Goiena

Kalte handiak eragin dituzte ekaitzek Euskal Herriko hainbat lekutan

Berria

Debagoienan, Iruñerrian eta Gasteizen hainbat kale eta lokal hartu ditu urak.

Iñigo Urkullu lehendakaria Eusko Legebiltzarrean, artxiboko irudian ©David Aguilar/ Efe

Urkulluk dio «berandu baino lehen» maskararen erabilera arintzeko era egon daitekeela kanpoaldean

Edurne Begiristain

Gaur arratsaldean bilduko da Labiren Aholku Batzordea, eta lehendakariak iragarri du litekeena dela gaueko aisialdia zabaltzeko neurriak hartzea.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.