ELAk eta oposizioak auzitan jarri dute deflatazioaren eragina

Inflazioari aurre egiteko neurrien artean, %4ko deflatazioak lortu du oihartzun handiena. ELAren eta oposizioko taldeen ustez —gaur emango du iritzia EH Bilduk—, motz geratu da. Gobernuko alderdien artean, Eneko Andueza PSE-EEko idazkari nagusiak txalotu egin du.

MIKEL NOVAL ELAren Azterketa Bulegoko arduraduna
«Egiten dena baino deigarriagoa da egiten ez dena»

ELAk «iruzurtzat» jo ditu Iñigo Urkullu lehendakariak eta hiru ahaldun nagusiek iragarri dituzten neurriok. «Euskal Herriko erakundeek uko egiten diote beharrezko zerga erreforma aurrera eramateari, enpresen mozkinei, kapitalari eta ondareari zergak handituz», adierazi du Mikel Noval ELAko Azterketa Bulegoko arduradunak. Alde horretatik, «egiten dena baino deigarriagoa da egiten ez dena».

Deflatazioari dagokionez, «berandu iritsi da, eta ez da nahikoa», tasak gehiago txikiagotzea urte hasieratik onartu behar baitzen. Gogorarazi du iazko inflazioa %6,4 izan zela Hego Euskal Herrian, eta tasen deflatazioa (%5,5) horren azpitik geratu dela. Era berean, 200 euroko kenkariaren aurka ere azaldu da Noval. Ez die «mesederik egiten» diru sarrera txikienak dituztenei, ez dutelako PFEZ errenta zergarik ordaintzen. «Beharrik handiena duten pertsonei laguntzeko, zuzeneko prestazio ekonomikoak behar dira, ez kenkariak».

MIREN GORROTXATEGI Elkarrekin Podemosen bozeramailea
«Neurri egokia da, baina ozta-ozta zuzentzen du inflazioaren eragina»

«Ezer baino hobe» dira inflazioari aurre egiteko lehendakariak aurkeztutako neurriak; ordea, Elkarrekin Podemosen Eusko Legebiltzarreko bozeramaile Miren Gorrotxategiren iritziko, «gehiago egin liteke». %4ko deflatazioarena «neurri egokia da teknikoki, ozta-ozta zuzentzen badu ere inflazioaren eragina».

Horregatik, Gorrotxategik uste du galdutako aukera bat dela neurri gehiago ez iragartzea: «Aprobetxatu zitekeen zerga sistema erregresiboaren diseinu klasista gutxitzeko, klase popularrei murrizketa gehiago eskainiz».

Bestalde, langile klasearen zati «murritz» bati besterik ez dio egiten mesede. Itundu diren soldata igoeren batezbestekoa %3,3 da, eta «oraindik hitzarmen asko ez dira negoziatu». Gainera, deflatazioa inflazioaren «oso azpitik dago». Ekainean %9,6ra heldu zen Hego Euskal Herrian.

ENEKO ANDUEZA PSE-EEren idazkari nagusia
«Inflazioak ez diekalterik egingo zaurgarrienei»

Eneko Andueza PSE-EEren idazkari nagusiak argi ikusten du inflazioari aurre egiteko neurriek zer onura dakarten: «Inflazioak ez die kalte egingo hiru lurraldeetako ordaintzaileei, batez ere zaurgarrienei». Andueza bera ez, baina alderdiko beste ordezkari batzuk neurri sortaren aurkezpenean izan ziren.

LUIS GORDILLO PP+Csen legebiltzarkidea
«Berandu dator, eta hutsaren hurrengoa izango da »

Iragarritako neurriak «ez dira nahikoa», Luis Gordillo PP+Csen legebiltzarkideak salatu duenez. «[Deflatazioa] Berandu dator, eta hutsaren hurrengoa izango da», horrekin batera beste neurri batzuk onartzen ez badira: esaterako, «gehiegizko burokrazia», tasa eta prezio publikoak ezabatzea.

Neurriok 250 milioi euro ez jasotzea ekarriko diete Jaurlaritzari eta hiru aldundiei. Gordilloren ustez, oharkabean pasatuko dira: «16.000 milioiko aurrekontua dute; ezerezean geratuko dira 250 milioi horiek, batez ere 2.000 milioiko zorroa dutelako».

Gehitu du kopuru horrek balio dezakeela produkzio sektoreari itzultzeko eta PFEZa are gehiago deflatatzeko. «Ahalik eta azkarren» onartu behar da inflazioari egokitutako deflatazioa.