EGUZKI EPELEAN

Harry Potter eta euskaldunen misterioa

Diego Pallés Lapuente -

2019ko abuztuak 15

Adiskide bakar batekin hasi zen txantxa, baina laster batean zabaldu zen lagunarte osoan. Azaldu baino lehen, testuingurua apur bat argituko dut. Duela urte gutxi batzuk baino ez nuen euskaraz bizitzeko erabakia hartu. Alegia, euskara pasiboki jasotzeko gai izatetik, aktiboki ere bilatzera igaro nintzen. Are gehiago, nire nortasuna hizkuntza honen bitartez eraikitzen hasi nintzen: pentsamenduak, lana, harremanak... Eta, aizue, pozarren orduz geroztik.

Erabaki hori hartu baino lehen, nire istorioa arras arrunta izan zen; Gasteizko gazte gehienen berdintsua, nire ustez. Hezkuntza sistemak hizkuntzarekiko indiferentzia hutsarekin eta solastatzeko erdipurdiko gaitasunarekin utzi ninduen; beste gauza askorekin batera gelaren barruan gordeta geratuko zen iraganeko eragozpentzat neukan euskara.

Askoren kasuan ez bezala, euskararen zera atabiko hori ez zen erakarri ninduen faktorea, ezta arbasoek ahaztutako hizkuntza berreskuratzeko nahia ere, familia Euskal Herritik kanpokoa bainuen. Tresna hutsa ez, baizik eta edukia nuen gustuko: euskal literatura eta musika hobeto ulertu nahian, buru-belarri ekin nion hizkuntza hobeto ikasteari —egunkari honen testuak, besteak beste, lagungarri prozesuan—, hizkeran nire jatorri muggle-a ikusezin bihurtu arte.

Askotan, ordea, lagunek zerbait lekuz kanpo dagoela igartzen dute. Tabernetan euskal abesti ezin mitikoagoren bat jartzean haiek erakusten duten frenesiaren aurrean axolagabe azaltzen naizenean, orduan haserre galdetzen dute: «Baina hi non ostia gorde haiz gaztaro osoan?». Hemen bertan, baina oso urrun aldi berean, antza.

Hortaz, hasierako adiskide burutsu horren txantxa. Harry Potter mundu magikoaren ezaugarri oinarrizkoenak aurkitzean nola, hala geratzen nintzen ni Laztana abestia erakutsi edo santomasei buruz lagunek hitz egiten zidaten bakoitzean: aho bete hortz. Bazter batean geratzen nintzen parrandetako abesbatzak Egingo dugu kriston kanika taldea leloa garrasika aldarrikatzeari ekiten zioen une horietan. Mago betaurrekodunaren lagunei bezalatsu, gauza barregarri bezain sinesgaitza iruditzen zaie nire lagunei arrunt-arruntak diren erreferentzia kulturalak eskimal bati bezala azaldu behar izatea beste euskaldun bati.

Jon Maiaren jarduna arretaz eta atseginez jarraitu dut haren berri eman zidanetik Altsasuko Extremadurako Etxeko presidenteak —etorkin komunitatearekin egiten duen zubi lanaren seinale—. Bera bezalako erreferenteak izatea, berria ez ezik, ezinbestekoa ere izan zitzaidan: identifikazio handia sentitu nuen. Eta horrelako nahikorik ez dagoela esango nuke, nahiz eta euskararen historian kanpotik etorritako euskaldun mordoa egon, literalki zein kulturalki. Beraz, euskaldunen munduan murgildu diren Harry Potterrengandik gauza bat gustatuko litzaidake: euskaraz bizi eta sortu ez ezik, haien bizipenak kontatzea, gure iruditeria aberasteko asmoz.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Santos Indurain kontseilaria prentaurreko batean, artxiboko irudian. ©Jesus Diges/EFE

324 kasu atzeman dituzte Hego Euskal Herrian

Berria

Kasuen beherakada orokorra izan da herrialde guztietan: Araban 44 kasu detektatu dituzte (-31); Bizkaian, 180 (-31); Gipuzkoan, 35 (-29); eta Nafarroan, 59 (-87). Nafarroako Gobernuak ez du neurri orokorrik ezarriko oraingoz. «Atzokoa ez zen alarma guztiak pizteko modukoa, eta gaurkoa ez da kriskitinak jotzekoa», adierazi du Santos Indurain Osasun kontseilariak.

Gizon bat PCR proba egiten, Donostian. ©Gorka Rubio / FOKU

Hogei milioi koronabirus kasu baino gehiago detektatu dituzte mundu osoan

Oihane Puertas Ramirez

COVID-19a 188 herrialdetara iritsi da, eta 736.000 lagun baino gehiago hil ditu.

Zahar etxe bateko egoiliarrak paseoan, artxiboko irudian. ©Marisol Ramirez/FOKU

Donostiako zahar etxe bateko egoiliar batek positibo eman du

Berria

Zahar etxe bereko bi langile ere kutsaturik daude.

Nafarroako osasun langileak PCR probak egiteko prest, artxiboko irudi batean. ©Jagoba Manterola/FOKU

Agerraldi bat detektatu dute Murillo el Fruto eta Zarrakaztelu inguruan

Berria

30 positibo atzeman dituzte; gehienak, laborarien artean.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna