Albistea entzun

Harrera beroa Beirieri

Lorentxa Beirie euskal preso ohi kanboarrari ongietorria eman zioten atzo, sorterrian. Ehunka lagun bildu ziren. Haren sendiak «zoriona eta harrotasuna» sentitu ditu.
Lorentxa Beirie euskal preso ohiak bere irudia kendu zuen zigantetik, atzo arratsaldean, Kanbon.
Lorentxa Beirie euskal preso ohiak bere irudia kendu zuen zigantetik, atzo arratsaldean, Kanbon. BOB EDME Tamaina handiagoan ikusi

Oihana Teyseyre Koskarat -

2021eko maiatzak 2

Hogei urte preso egon ondoan, Euskal Herrian da Lorentxa Beirie. Herenegun atera zen Roanneko espetxetik (Frantzia), eta harrera egin zioten atzo arratsaldean sorterrian, Kanbon (Lapurdi). Ehunka lagun bildu ziren herriko baratze publikoan, preso ohiari ongietorria emateko. Kanboko ziganteek eman zioten hasiera ekitaldiari, balsa dantzatuz, Beirieren argazkia oraino bizkarrean zutela. Familiaz eta lagunez inguraturik agertu zen Beirie. Eszenara igo zen, Izan zaretelako gara, milesker zioen banderola azpialdean. Kanboko zigantearen bizkar gainetik kendu zuen bere argazkia, txalo artean.

Ellande Alfaro eta Maddi Sarasua aritu ziren bertsotan, «herri aske baten ametsa» aldarri, Beirieren «borrokarako indarra» gogoan. Argitxu Hiriart Urruti Kanboko hautetsi eta Dzidzau presoen komiteko kidea honela mintzatu zen: «Hogei urtez ukan dituzun bisitak, gutunak, eta sostengu bazkarien berriek zure bihotza berotu dute, nahiz eta argi dugun momentu zailak eta luzeak pasatu dituzula».

Aire Ahizpak kantari taldeak ere parte hartu zuen agerraldian, eta Denak ala inor ez kantua eskaini zioten euskal preso ohiari. Azken hogei urteetan Fleury Merogis, Joux la Ville eta Roanneko espetxeetan bisitan joan zaizkion lagun guziek sokadantza eman zuten ondotik, eta Beirie ere batu zen dantzara. Kattin Bergara da lagun horietako bat, Xalbador kolegioan harekin ikasitakoa baita. Gutun bat irakurri zion Bergarak Beirieri. Gogoan izan zituen lagun artean partekatutako hainbat oroitzapen, eta «aitzinatu ahala hartutako bideak» ere bai. «Milesker, Lorentxa, zarena izateagatik, eta milesker zarena gurekin partekatzeagatik. Ongi etorri etxera!», bukatu zuen. Publikoaren harrera zabala jaso zuen, orduan, Beiriek, txalo zaparradarekin.

Kanboko eta inguruko herrietako zenbait gaztek, bestalde, kantu bat idatzi zioten preso ohi kanboarrari: «Indartsuago gara zuri esker, borrokatzen segitzeko», zioen errepikak. Niko Etxart kantaria Oihaneko zuhainetan kantatzeko igo zen eszenara. Finitzeko, aurresku «herrikoi eta parte hartzailea» egin zuten hainbat lagunek, dozena bat euskal preso ohi eszenara igo zirela, Beirierekin batera.

Presoak gogoan

Amaia Beirie Lorentxaren ahizpak honela laburbildu zuen atzoko eguna: «Zoriona eta harrotasuna». Eta gehitu zuen: «Presoen senide izateari utzi diogu. Halere, gogoan ditugu oraino kartzelatuak diren 200 pasa presoak». Amaia Beiriek gogoan izan zuen Saioa Sanchez euskal presoa, Roanneko kartzelan egon baita haren ahizparekin azken hilabeteetan. «Kondena oso pisuak ditu betetzeko», salatu zuen.

Urteetan Beirieren lagun izan den Pantxika Bergara honela mintzatu zen: «Une oro gozatzen ari gara. Lorentxa azkar ikusten dugu. Argi da presondegiak ez duela suntsitu». Agerraldia finitzean, Lorentxa Beiriek eskerrak eman zizkien han bildu ziren «ezezagun zein ezagunei».

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©EUSKALTZAINDIA / BERRIA

Pentsalari poliedrikoa

Igor Susaeta

Federiko Krutwigen jaiotzaren mendeurrena da gaur. Erreferentziazko intelektuala izan zen, eta haren ibili oparoko lan garrantzitsuenetako bi dira Euskaltzaindia berritzeko proposamena 1949an, eta ETAren V. Biltzarreko txostenak. 'Krutwig oroimenean' testua idatzi du Xabier Kintana euskaltzainak.

Justizia errestauratiboaren alde egin du Artolazabalek

Berria

Biktimek eta espetxe ereduak ez dutela zertan antagonikoak izan adierazi du Eusko Legebiltzarrean
Hamaika Gara kanpainaren agerraldia atzo Bilbon. ©MARISOL RAMIREZ/FOKU

Mobilizaziora deitu du Gure Eskuk, Bilbon

Maialen Arteaga

Uztailaren 3an egingo da, eta erabakitzeko eskubidearen aldeko ekintza «politiko eta kulturala»izango da. Hamaika Gara sinadura bilketatik abiatuta, beste egitasmo batzuk hasiko dira gaur zortzi

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.