Eñaut Aramendi. G7 Ez plataformaren bozeramailea

«G7koen kontrakoa egin nahi dugu: denon artean denontzat gogoetatu»

Gaurtik etzira bitartean Ficoban egingo duten kontragailurra «erantzun politiko bat» dela dio Aramendik. Aukera baliatuko dute G7koek landuko ez dituzten gaiak lantzeko eta irakurketa komun bat adosteko.
GUIILAUME FAUVEAU Tamaina handiagoan ikusi

Ander Perez Zala -

2019ko abuztuak 21

Buru-belarri ari da lanean egunotan Eñaut Aramendi (Hendaia, Lapurdi, 1979) G7 Ez plataformako eleduna. Ficoban bileraz bilera ari da, eta horien artean tarte bat izan du BERRIAren galderei erantzuteko.

Kontragailur bat egiteko beharra ikusi duzue.

Ezin genuen Euskal Herrian G7koen bilera batekin egon eta erantzunik gabe geratu. Badakigu G7a tranpa bat dela, ez dutela ezer konponduko, eta hor egongo direla haien teoria ekonomikoa eta politikoa segitzeko. Hori ikusirik, iruditu zaigu garrantzitsua zela mobilizatzea, eta horregatik erabaki genuen plataforma bat sortzea.

Erantzun bat da, beraz.

Gure erantzuna politikoa da. [G7an] Landuko ez dituzten gaiak landu nahi ditugu. Alde batetik, eztabaiden eta konferentzien bitartez ideien eztabaida egitea; bestetik, masa mobilizazioa izatea, eta horregatik antolatu dugu etziko manifestazioa. Denok dugu arrazoi on bat manifestatzeko, izan ingurumena, izan feminismoa, izan migrazioaren arazoak, izan soziala... Eta, azkenik, desobedientzia zibilaren atala dugu. Horregatik antolatu ditugu igandeko mobilizazioak, ohartarazteko manifestatzeko eskubidea kendu dutela gailurra dagoelako.

Zer espero duzue?

Oso zaila da esatea. Helburu politak jarri ditugu; hitzaldi politak, Euskal Herritik, Frantziako Estatutik eta nazioartetik etorriko diren hainbat jenderekin. Horrelako kontragailur bat egitea hilabete askotako lana da, elkarte askorekin elkarlanean, bakoitzaren nahiak eta helburuak errespetatuz. Gauza bat jada irabazi dugu: elkarlana. Kontragailurrean lortu da 100 bat elkarte lankidetzan aritzea, eta horrekin alternatiba eraiki dugu.

Euskal Herrian izatea berezitasun bat da?

Noski. Euskal Herriak egoera politiko berri bat sortu du azken hamar urteotan, sekulako borondatearekin eta alde bakarrez. Orain hona datoz G7 batekin, injustiziez aritzera... Ikusten da kristoren tranpa dela. Hizkuntzarena ere berezitasun bat da; kontragailurra lau hizkuntzatan egingo dugu. Iruditzen zaigu hori garrantzitsua dela. Beste edozein tokitan egingo balitz, euskara ez zen egongo. Baliatuko dugu erakusteko badagoela hizkuntza txiki bat euskara deitzen dena.

Desberdinen arteko lotura, batasuna, lortu duzue?

Batasuna bai. Lortu duguna da gure desberdintasunen gainetik pasatzea. Desadostasunak baditugu, baina, ados ez gauden puntuak baztertuz, elkarlanerako borondatea erakutsiko dugu ados gauden puntuetan. Hori inportantea da. G7ko handiek ezin dute mundu osorako erabaki; alderantziz izan beharko luke.

G7koen helburua «desberdintasunak murriztea» da. Gai horri eutsiko diozue zuek ere?

Bai. Guk nahi duguna da hori praktikara eraman. Euskal Herrian jada existitzen dira alternatiba asko, baina oraindik badugu asko hobetzeko, konpartitzeko, eta segur aski eztabaida guztietatik aterako dugu zerbait.

Gutxi batzuek [G7koek] ezin dute denentzat pentsatu; guk haien kontrakoa egin nahi dugu, guztien artean guztiontzat gogoetatu nahi dugu. Nola egin daitekeen gauzak hobetzeko; horrek izan behar du gure lehentasuna. Xede horrekin sartuko gara kontragailurrean, eta irakurketa komun bat adostuko dugu. Zerbait txukuna aterako zaigu.

Kontragailurra bideko beste pauso bat da?

Pauso honek emango digu aukera beste pauso batzuk emateko. Helburua ez da egunotan erantzun guztiak bilatzea. Frantsesez esaten den bezala, «bakarrik azkarrago goaz, baina elkarrekin urrunago».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Salvador Illa Espainiako Osasun ministroa gaurko agerraldian. ©Chema Moya/EFE

Diskotekak eta gaueko tabernak ixteko agindu du Madrilek

Berria

Neurriak zorroztuko dituzte Hego Euskal Herrian, egoera epidemiologikoak okerrera egin duela eta. Gainerako taberna edo jatetxeek 01:00ean itxi beharko dute, eta gauerditik aurrera ezingo da bezero gehiagorik sartu. Kalean erretzea ere debekatuta egongo da, bi metroko tartea bermatu ezin bada.

Jendea paseoan Donostiako alde zaharreko kaleetan, atzo. ©Juan Carlos Ruiz/FOKU

618 kasu atzeman dituzte Hego Euskal Herrian

Berria

Bizkaian behera egin dute kasuek; Araban, Gipuzkoan eta Nafarroan, aldiz, igo egin dira.

Osasun langileak PCR probak egiten Donostian, aurreko astean. ©Gorka Rubio/FOKU

Azpeitiko Erdikalean ibili zirenei proba egiteko eskatu die Jaurlaritzak

Berria

Abuztuaren 7tik 9ra bitartean kale horretan ibilitakoek egin beharko dute testa.

Rafael Bengoa, artxiboko irudi batean ©Gorka Rubio / Foku

«Mikrokonfinamenduak» ezartzearen alde dago Bengoa

Irati Urdalleta Lete

Eusko Jaurlaritzako Osasun sailburu ohiak aztarnarien falta dagoela azpimarratu du. Uste du agerraldiak egotea herritarren portaeraren eta administrazioaren kudeaketaren ondorioa dela.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna