Albistea entzun

Lurraldetasuna

Mapa bat baino gehiago

Seaskako Bernat Etxepare lizeoak Euskal Herriko mapa bat kaleratu du, erliebean, eguneratua eta euskara hutsean. Lizeoa handitzeko dirua lortu nahi dute.
Bernat Etxepare lizeoak salgai jarri duen mapa.
Bernat Etxepare lizeoak salgai jarri duen mapa. BERNAT ETXEPARE LIZEOA Tamaina handiagoan ikusi

Jakes Goikoetxea -

2021eko abenduak 4

Urte askotan ohikoa izan da hainbat etxe, erakunde, egoitza eta elkartetako hormetan Euskal Herriko mapak ikustea. Pablo Picassoren Gernika, Zazpiak Bat-en armarria... eta Euskal Herriko mapa. Laua edo erliebean. Mapa horietako asko, ordea, desagertu egin dira. Euskal Herriaren irudikapen grafikoak ez dira hain ohikoak. Ikasleei, esate baterako, lurraldetasunari dagokionez, sekulako mapa eta kontzeptu nahas-mahasa eskaintzen diete testuliburuetan.

Hemen eskura daiteke mapa.

Euskal Herriko mapa erliebean nahi izanda ere, ez zen erraza lortzea. Elkar argitaletxeak egiteari utzi zion duela hogei urte. Orain, baina, Baionako Bernat Etxepare lizeoak eskaintzen du: Sua argitaletxeak Euskal Herriko mapa eguneratu du, Elkarrek egin, eta Bernat Etxeparek salgai jarri.

Seaskaren (Ipar Euskal Herriko Ikastolen Elkartea) lizeo bakarra da Bernat Etxepare. Lapurdiko, Nafarroa Behereko eta Zuberoako 400 ikasle inguru ditu.

Lizeoa konpontzeko, berritzeko, handitzeko edo hornitzeko, diru premia dute. Lizeoa handitzeko dirua lortzeko asmoz, «zerbait interesgarriaren, originalaren eta salgarriaren» bila ari ziren. Euskal Herriko mapa bat, erliebean, eguneratua eta euskara hutsean kaleratzea otu zitzaien, Kattin Bergara lizeoko lehendakariaren arabera. Pentsatu, «ausartu» eta egin. Salgai dago jada.

Produktu bat da, baina «produktu sinboliko» bat. Mapa bat baino gehiago leloa jarri diote kanpainari. «Euskararen herria irudikatzen du». Seaskaren ikastetxeetan egunero egiten duten lana erakusten duen tresna bat da: 2 urtetik 18 urtera arte euskarazko hezkuntza eskaini. «Proiektu pedagogiko sendo bat, herri proiektu bat», Bergararen arabera. «Euskararen munduan murgiltzen dira, euskararen mapan sartzen dira».

Euskal Herriko mapa, mugarik gabea. Errealitatean, ordea, badaude mugak, eta lizeoko ikasleek jasaten dituzte, oztopoak baitituzte gainerako herrialdeetan goi mailako ikasketak euskaraz egiteko. «Mapa horrek gure ametsa ere erakusten du: euskara ofiziala izatea Ipar Euskal Herrian», eskatu du Bergarak.

Euskal Herriko mapa, zazpi probintziarekin. «Denboraren poderioz, ez da hainbeste ikusten Euskal Herria osorik, zazpi probintziekin», azaldu du Bernat Etxepare lizeoko lehendakariak. Horri aurre egiteko asmoa ere badute, garrantzitsua iruditzen baitzaie «euskararen bidetik Euskal Herria berriro agerraraztea».

Mapak salgai daude, bai Bernat Etxepare lizeoaren webgunean, bai BERRIAren Interneteko dendan, 99 euroan. Bergarak eskertu egin du BERRIAren laguntza. Egunotan Durangoko Azokan ere salduko dituzte mapak.

Gaur aurkeztuko dute mapa, Durangon bertan, 16:00etan, Landakoren kanpoko plazan. Xabi Solano musikariak parte hartuko du. Kanta bat sortu du, eta Bernat Etxepare lizeoko ikasleekin kantatuko du.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

ETB1ek <em>Beste egun bat bizirik</em> filma (2017) eman zuen atzo, euskarara bikoiztuta, 23:30ean. ©ETB

EITBk esan du euskarazko zinema «erreserban» dutela, «aldi batez»

Urtzi Urkizu

EITBko zuzendari nagusiak EH Bilduri erantzun dio emisio leiho digitala lehenesten duela

 ©JAGOBA MANTEROLA / @FOKU

«Errepidetik goaz lekua aldarrikatzeko»

Olaia L. Garaialde

Gehienetan bizikletan doa Arguelles, eta sendabelarrak identifikatzeko eta erreka garbitzeko ibilaldiak egiten ditu: «Askotan egun bakarrean sei zabor zaku handi jasotzen ditugu errekatik».
1 ©JAGOBA MANTEROLA / @FOKU

Mikroak piztu, ezagutarazteko

Olaia L. Garaialde

Musikaz gozatzeko antolatzen dituzte mikro irekiak. «Lagun arteko» gune «erosoak» dira, jendea ezagutzeko, elkartzeko, norberaren artea ezagutarazteko eta lehenengo aldiz publikoaren aurrean jotzeko. Horren adibide dira Toki Leza taberna eta Open Mikros egitasmoa.

Juanan Tejero eta Iban Garate. ©ETB

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Jakes Goikoetxea

Informazio osagarria

Iruzkinak kargatzen...