Albistea entzun

Zaldibarko luiziaren urteurrena

Beste bi eremutan ekingo diote Beltran bilatzeari

Ingurua egonkortuta, martxoan hasiko dute «fase berria». Adituen txostenaren arabera, Eusko Jaurlaritzak Verterri emandako baimenak «Europak ezarritako baldintzak» betetzen zituen. Tapiak enpresa jo du ingurumen kalteen erantzule
Josu Erkoreka eta Arantxa Tapia, atzo, Zaldibarren.
Josu Erkoreka eta Arantxa Tapia, atzo, Zaldibarren. J. F. / FOKU Tamaina handiagoan ikusi

Aitor Biain -

2021eko otsailak 7 - Zaldibar

Urtea bete zen atzo Zaldibarko zabortegia (Bizkaia) amildu zenetik, eta Joaquin Beltranen arrastorik ez dago. Hondakinen azpian harrapatuta geratu zen Beltran, eta, hura bilatzeko lanetan etenik gabe aritu badira ere, ez dute ezer aurkitu. Hori dela eta, Eusko Jaurlaritzak iragarri du beste bi eremutan hasiko dituztela arakatze lanak: kamioiak garbitzeko putzua zegoen tokiaren inguruan, hain zuzen ere. Eremua egonkortzen ari dira egunotan, eta martxoan ekingo diote lanei.

Izan ere, Eusko Jaurlaritzarentzat Beltranen gorpua aurkitzeak «lehentasuna» du oraindik ere, «itxaropen irmoa» du horretan. Hala adierazi zuen, atzo, Josu Erkoreka lehendakariorde eta Segurtasun sailburuak, zabortegian bertan egindako agerraldian. Arantxa Tapia Ekonomia Garapen, Jasangarritasun eta Ingurumen sailburua ere han izan zen, ingurua egonkortzeko lanak zertan ziren azaltzeko. Minutuko isilunearekin oroitu zituzten hildako bi langileak, agerraldia hasi baino lehen.

Eusko Jaurlaritzaren arabera, «arin eta eraginkor» jardun dute hasiera-hasieratik, eta «atsedenik gabe» ari dira Alberto Sololuzeren eta Joaquin Beltranen bila hamabi hilabete hauetan. Erkorekaren hitzetan, urte osoan soilik bost egunez eten dituzte lanak —Eguberrietan izan zen—. Iazko abuztuan aurkitu zituzten Alberto Sololuzeren gorpuzkiak, eta, ordutik, Beltranen bila aritu dira larrialdi zerbitzuak Verterren zabortegian. Haren arrastorik ez dute aurkitu oraindik, ordea.

Beltran azkenekoz ikusi zuten eremuak arakatu dituzte orain arte. «Lehentasunezkotzat» jotzen zituzten bi eremu hustu eta aztertu dira urriaz geroztik, batez ere: 114.000 metro kubiko hondakin arakatu dira denera. Baina «emaitzarik gabe» amaitu dituzte lanak. Horregatik erabaki dute beste fase bati ekitea eta bilaketa lanak tokiz aldatzea: B1B eta B1C eremuetan hasiko dira orain, hau da, zabortegian kamioiak garbitzeko putzua zegoen lekuan. Adituen arabera, Beltran eremu horretan egon liteke Sololuze zegoen lekura mugitu izan balitz, Erkorekak adierazi duenez: «Joaquin Beltran aurkitzeko itxaropenarekin ekingo diogu bilaketa fase berriari». Apirilera arte iraungo dute lan horiek.

Arrastorik aurkitu ezean, ordea, beste eremu bat arakatzeko asmoa ere azaldu du Jaurlaritzak: B4S eremuaren goiko aldea, hain zuzen ere, zabortegiaren albo batean geratzen den gunea. Ingurua aztertzen aritu diren adituek gomendatu dute eremu hori ere arakatzea.

Erkorekak nabarmendu du, dena den, lanak «konplexuak» direla, eta «zailtasun handiak» dituztela. Adierazi du, gainera, hainbatetan eten behar izan dutela bilaketa azterketa zehatzagoa egin ahal izateko, besteak beste. Hori dela eta, erreskate taldeei egindako «lan eskerga» eskertu eta aitortu die Segurtasun sailburuak.

Bilaketa lanak noiz arte luzatuko diren ez dago batere garbi, halere; hau da, bilaketa eremu berrietan Beltranen arrastorik aurkitu ezean zer egingo duten. Tapiak aurreratu du, edonola ere, behin lanak amaitutakoan zabortegia itxi egingo dutela: «Zaldibarko zabortegi honetan ezingo da hondakin gehiago isuri; behin betiko itxiko dugu».

Txostenak

Zabortegia itxi aurretik galdera asko daude erantzuteke oraindik: zergatik amildu zen edota erantzukizunak norenak diren argitzea falta da, besteak beste. Zer gertatu zen ikertzeko, Jaurlaritzak txosten bat eskatu zion Bartzelonako Unibertsitateko eta Kantabriako Unibertsitateko aditu talde bati. Bada, Tapiak azpimarratu du jaso dutela geoteknia ikerketa hori, eta fiskaltzaren esku utzi dutela dagoeneko, «beraiek erabaki dezaten zer egin dokumentu horiekin».

Sailburuak ez du txostenen edukiaren berri eman, baina esan du zabortegia eraikitzeko eta iragazgaitzeko moduan egiten duela «azpimarra», batez ere. «Goiz da oraindik ezer esateko. Orain gutxi jaso dugu, eta sakonago aztertu behar dugu, txosten oso zehatza baita», adierazi du sailburuak.

Beste txosten bat ere eskatu zuen Jaurlaritzak. Kasu honetan, hondakin ez-arriskutsuen zabortegi bat ustiatzeko Jaurlaritzak Verter Recycling enpresari emandako ingurumen baimenaren ingurukoa. Tapiak azaldu duenez, baimenak «Europak ezarritako legezko baldintzak eta eskakizunak betetzen zituen». Eta gaineratu du Jaurlaritzaren Ingurumen Sailaren ikuskapenak eta kontrolak «zuzentarauen arabera» egin zirela ere zehazten duela ikerketak.

Hori horrela, Eusko Jaurlaritzak Verter Recycling enpresari egotzi dio ingurumen kalteen ardura oro. Hala ebatzi du zabortegia amildu eta berehala enpresari zabaldu zion espedientea oinarri hartuta. Eta, beraz, lurpeko uren, lurrazaleko uren eta lurzoruaren gaineko ingurumen kalteak konpontzeko proiektu bat aurkezteko eskatu dio enpresari.

Hondakinekin zer?

Guztira, 525.000 metro kubiko hondakin mugitu dituzte orain arte zabortegia egonkortzeko, 5.000 metro kubikotik gora egunean. Horien laurden bat baino ez da gorpuzkien bilaketari dagokiona, nolanahi ere. Tapiak aurreratu du, baina, mugitzen ari diren hondakinak jasotzeko sortutako bi biltegiak ere itxi egingo dituztela lanak bukatzean.

Hori dela eta, zabortegia ixten denean industria hondakinekin zer egin ere argitzeke dago oraindik. Iaz, industria hondakinen kopuru bat Kantabriara eta Errioxara eraman zen 46.000 tona eta 34.000 tona hurrenez hurren. Tapiaren hitzetan, baina, kopuru «txiki bat» baino ez da, kontuan izanda zenbat sortzen den Arabako, Bizkaiko eta Gipuzkoako industrian. «Ahalegin handia egin da, batetik, martxan ditugun zabortegietan jasotzeko, eta, bestetik, hondakin horiek balorizatzeko», nabarmendu du.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Albiste gehiago

 ©GORKA RUBIO / FOKU

«Alderdien arteko jokotik kanpo utzi behar da hizkuntzaren auzia»

Julen Aperribai

Kontsentsuak sortzeko duen gaitasuna goratu dio Eskisabelek Kontseiluari, baita eraldaketa prozesuekin lotzeko borondatea ere. Horretan eragin nahi du, baina bide horretan hasia ikusten du euskalgintza.
Donostia ospitalea, artxiboko irudi batean. ©JAVIER ETXEZARRETA / EFE

Osakidetzaren kudeaketa eredu «bertikalak» eragindako zurrunbiloa

Arantza Iraola - Paulo Ostolaza - Edurne Begiristain

Donostiako ESIko langileen artean «ezinegona» dago. Donostiako ESIko 30 bat zerbitzuburuk Osakidetzaren «politika suizida» salatu dute

Idurre Eskisabel Kontseiluko idazkari nagusia eta Paul Bibao karguan haren aurrekoa, atzean Kontseiluko eragileetako ordezkarik dituztela, gaur, Durangon (Bizkaia). ©Euskalgintzaren Kontseilua

Adostasunak eta «letra larriko politika» aldarrikatu ditu Eskisabelek, Kontseiluaren lema hartuta

Julen Aperribai

Euskararen biziberritzea «justiziari eta kohesio sozialari muin-muinean» lotutako auzia dela defendatu du idazkari nagusiak, eta balio horiekin bate egiten duten guztiekin adostasunak bilatuko dituela aurreratu. Tresna berriak behar ditu euskaldunek, haren arabera, «bizitza bizigarriak izango badituzte».

SATSE, ELA, LAB, CCOO eta UGT sindikatuek deituta, otsailean Osakidetzan egindako greba. ©MONIKA DEL VALLE / FOKU

Osakidetzako arazoak lehenagotik datozela salatu dute sindikatuek

Isabel Jaurena

SATSE «kezkatuta» dago gertatutakoak osasun langileengan izanen dituen ondorioengatik

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Hitzen, ekintzen eta errimen eztanda. Herri bat BERRIAren kulturaren plazan. Baliatu udazkenean BERRIAlagun egiteko eskaintza.