«Larria da errolda baldintza izatea hainbat eskubideren jabe izateko»

Caritasek ohartarazi du bazterkeria egoerak «gero eta konplexuagoak» direla. Larri baztertuta daudenak arazoen amaraunean murgilduta daudela ohartarazi du Maite Sebal Gasteizko Caritaseko arduradunak.

Pobrezia larrian bizi direnak ikusezin egin dira. Zergatik?

Prekaritate eta ziurgabetasun egoeratik irten garenok hobeto gaude, baina ez dugu ikusi nahi oraindik badela gaizki pasatzen ari den jendea. Egoera hobetu den arren, instituzioen euskarririk ez duten familia asko etortzen da gurera. Pertsona horiek gure gizartearen parte dira, gure inguruan daude, eta ezin diegu bizkarra eman, ezin dugu beste aldera begiratu.

Bazterketa egoerak gero eta konplexuagoak direla esan duzue. Zergatik?

Gizarte langileek esaten digutena da arta eskatzen dutenei egiten dizkieten elkarrizketak luzeagoak eta gogorragoak direla, haien arazoak ere larriagoak direlako. Bazterkeriaren alderik gogorrena irudikatzen dute pertsona horiek, eta sarritan elkarrizketa bakar bat ez da aski izaten irtenbidea bilatzeko. Arazo asko kateatuta izaten dituzte: etxebizitza, lan prekarioa, arrakala digitala...

Emakumea eta migrantea. Azken urteotan ez da asko aldatu Caritasera jotzen duten gehienen profila.

Estuki lotuta dago zaintza lanekin. Emakume migrante asko gure herrira datoz uste dutelako etxeetan lan egiteko aukera izango duela eta diru apur bat irabaziko dutela jatorrizko herrialdean duen familiari laguntzeko. Baina iristen direnean, oztopoak bata bestearen atzetik topatzen dituzte. Oraindik ere, beltzean lan egitera kondenatuta daude andrazko asko, ez baitiegu beste aukerarik uzten.

Atzerritarren Legea erreformatzea ezinbestekoa da?

Gure herrialdera bizitzera datozenak ez datoz besteren kontura bizitzera: lan egitera datoz, baina enplegua lortzeko aukerarik ez dutela ikusten badute, beltzean lan egingo dute. Lege hori oztopo bat da, eta aldatu behar da.

Etxebizitzari eusteko zailtasunek zein ondorio dituzte?

Oso larria da errolda baldintza izatea hainbat eskubideren jabe izateko. Pertsona batzuk errolda erosten ari dira zenbait eskubide eskuratu ahal izateko. Etxebizitza bat eskuratzeko arazoa orokorra da, baina hauentzat arazoa are larriagoa da.