Noiz sortua: 2020-05-20 00:30:00

Pultsuari eutsi behar diogu oraindik

Manuel Garcia-Bengoetxea - Gipuzkoako Sendagileen Elkargoko lehendakaria

2020ko maiatzak 20

Pandemiaren une erabakigarrian gaude; gauzak ondo ez baditugu egiten, orain arte egindako ahalegin guztia alferrikakoa izan daiteke. Nekatuta gaude, baina birusari pultsua eutsi behar diogu oraindik.

Hau ez da jolas bat, inor ez da esajeratzen ari, ikusi dugu birus hau zer abiadatan hedatzen den eta zer nahasmen sor ditzaken gure gorputzean. Begiratu besterik ez dago zer heriotza tasa eragiteko gai den. Herritarron %100ek arriskuan jarraitzen dugu, eta %100ek hartu behar dugu konpromisoa: gomendioei zorroztasunez jarraitzea. Ezin dugu gaixotasuna hedatzea erraztu dezakeen keinurik egin, askatasunaren, komenigarritasunaren edo, besterik gabe, iritzi pertsonalaren izenean.

Adituek alderdi asko izan dituzte kontuan erabakiak hartzerakoan eta gomendioak egiterakoan; hala nola etxetik ateratzeko dugun beharra, alderdi sozioekonomikoak eta, nola ez, epidemiologikoak. Ezinezkoa da guzti-guztion beharrei eta berezitasunei erantzutea. Horregatik bete behar ditugu adituek esandakoak, adituak direlako eta, akatsak akats, gu guztiontzat hoberena dena egiten saiatzen ari direlako. Ados egon gaitezke ala ez neurriekin, baina bistakoa da emaitzak eman dituztela. Duela aste batzuk baino hobeto gaude.

Arduraren garaia da, maila pertsonalean eta kolektiboan; honetan ez digu balio ardurak besteen gain uzteak, ezta arauak hausteak ere, gustuko ez ditugulako edo ez direlako gure beharretara egokitzen; gure jarreraren menpe dago norberaren segurtasuna eta denona. Zenbat eta seguruago egon guztiok, seguruago egongo naiz ni. Ezin gara arduragabeak izan. Garestiegia da trukean eman beharko duguna.

Osasun langileentzat oso momentu zaila da. Denek lan ikaragarria egin dute, eta asko arrisku bizian izan dira, gutxienez 55 mediku hil dira, guztira 70 osasun langile baino gehiago, eta milaka lankide gaixotu dira bidean. Zerbitzu guztietan (lehen mailako arreta, larrialdiak...) ahalegin fisiko eta psikiko neurrigabea eta ordainezina egin da; ez herritarrok, ez osasun langileok, ez sistemak, ezin dio aurre egin bizi izan dugunaren neurriko beste egoera bati.

Hilabete batzuk behar ditugu, urtebete, agente infekzioso berri horri buruzko ikerketak behar adina argi eman dezan terapeutika zehatz bat lortu eta gaur egungoa bezalako beste egoera bat ez errepikatzeko. Pentsa dezagun birusaren hedapen bizkorraren arrazoi sakonenak ulertuta, eta baliabide kliniko eta terapeutikoak eskura izanda, etorkizun hurbilean infekzioa kontrolatu ahal izango dugula. Bien bitartean, jarrai dezagun mantrarekin: «eskuak garbitu, distantzia, maskara». Zuhurtzia erabatekoa.

Laburbilduz, ez dezagun ardura besteen gain utzi, DENOK, salbuespenik gabe, jarraitu behar ditugu gomendioak, ez dezagun pentsa besteentzat baino ez direnik. Ezin gara erlaxatu. Lehen bataila atzean uzten ari gara, baina hemen ez da ezer amaitu.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Maiatzaren 29an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan bost pertsona hil dira COVID-19 gaitzaren eraginez, hamabi positibo atzeman dituzte PCR probekin, eta hiru gaixo ospitaleratu dituzte. Euskal Herrian 29.287 gaixok eman dute positibo guztira, koronabirusa atzemateko probaren bat eginda. Horietatik 2.066 hil dira. Grafikoak, albiste barruan.

Iñigo Urkullu eta Nekane Murga, goizeko bileran. ©/ Irekia

Ekainaren 8an hirugarren fasera igarotzeko eskatuko du bihar Jaurlaritzak

Jon O. Urain

Nafarroako Gobernuak «oso balorazio positiboa» egin du erkidegoek konfinamendua leuntzeko hirugarren fasea kudeatzeko aukeraz.

Aitor Esteban eta Salvador Illa, Kongresuan. / ©Ballesteros, EFE

Erkidegoek kudeatuko dute hirugarren fasea

Jon Ordoñez Garmendia

Alarma egoera luzatzeko akordioa egin dute Espainiako Gobernuak eta EAJk, eta horren truke Urkulluk eta Txibitek hartu, kendu, moldatu eta ezarriko dituzte alarma egoeratik ateratzeko neurriak hirugarren fasean Hego Euskal Herrian. ERCrekin ere egin du akordioa Madrilek. Jaurlaritzak bihar eskatuko du ekainaren 8an hirugarren fasean sartzea.

 ©BERRIA

Kulturgintza: eutsi ala hautsi

Iñigo Astiz

Koronabirusaren hedapenak ziurgabetasun handia eragin du aurrez ere prekaritateak gogor jotako sektore batean: kulturgintzan. Sorkuntza ere krisi honi aurre egiteko moduan dagoen jakiteko, lau sortzaile elkarteren zuzendaritzako kideak bildu ditu BERRIAk: Eneritz Artetxe (Ehaze), Garbiñe Ubeda (Euskal Idazleen Elkartea), Aitor Bengoetxea (Musika Bulegoa) eta Igor Elortza (Euskal Herriko Bertsozale Elkartea).

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna