Liburugile bihurriak

Bestiario guztiak bezala, irudiz eta testuz hornitutako katalogoa da liburu hau.

Bertan aurkituko ditugu hogeita hiru neskatoren erretratuak eta deskribaketak, ezker-eskuineko orrietan banatuta, adibideekin frogatzeko neskak ez direla, ez beti, ez guztiak, onak eta esanekoak. Aldarrikatzeko ezarritako estereotipo-zama horren ordez, denetarik dagoela munduko neskatilen artean. Nola bestela?

Testuak irakurterrazak dira, marrazkiak ere haur literaturaren estetika daukate, eta tarteka egiten dituzten keinu zein bihurrikeriek ere, lehen hezkuntzako neska mutikoen irakurketarako direla adierazten dute (zaharragoentzako ere bai, noski).

Hiru egileak literatura feministan esperientziadunak dira, eta nabaria da. Cameros eta De Blas elkarrekin aritu ziren Marizipriztinek ez du zorioneko galeperrik nahi arrakastatsuan (Txalaparta, 2009), eta Larralde argentinarrak argitaratu berri du gaiarekin lotutako beste obra interesgarri hau: 150 libros y recursos TIC para abordar la Educación Sexual Integral (Paidós, 2018).