Albistea entzun

Krisi egoerara pasatu da Ipar Euskal Herria, azken asteetako lehorteagatik

Alerta egoeran ziren Euskal Herriko 95 herriak ondoko mailara pasatu ditu prefetak, herenegun gauean. Neurrien azkartzea ekarri du horrek
Baratzeak 20:00ak eta 08:00ak artean bakarrik urezta daitezke.
Baratzeak 20:00ak eta 08:00ak artean bakarrik urezta daitezke. SEBKO PHOTO Tamaina handiagoan ikusi

Leire Casamajou Elkegarai -

2022ko abuztuak 27 - Baiona

Uraren arazoa gaizten ari da Ipar Euskal Herrian gaindi. Abuztu hasieran prefetak ezarri neurriak ez dira nahikoa izan idorteari aurre egiteko. Guztira, orain arte, Biarnoko eta Ipar Euskal Herriko 103 herri «alerta» egoeran sartuak ziren. Neurri horien eragina ez da espero zutena izan, eta, orduan, aterabideak atzeman beharrean, «krisi» egoera zabaldu da Ipar Euskal Herriko 95 herritara, herenegun.

Uztaila eta abuztuaren lehen bi asteak biziki idorrak izan dira. Prefeturak azaldu duenez, «abuztuaren 18ko eurien aurreko emarira itzuli dira errekak, 22tik goiti, jadanik». Hala, abuztuan uztailean baino euri gehiago egin badu ere, eta baldintza meteorologikoak hobeak izan badira ere, ez da nahikoa izan lehortea gainditzeko, eta «baliabideen mailak apal dirau oraindik ere».

Ur edangarriaren erabilpenari dagokionez, prefeturak azaldu du «tentsioak zinez biziak» direla lurralde jakin batzuetan. Erraterako, «Euskal Herriko hego eta mendebaldean» eta «Ortheze [Okzitania] eskualdean» egoera beste toki batzuetan baino kritikoagoa da, haren erranetan.

Lehortea badenez oraindik, prefetak erabaki du orain arte martxan ziren ur edangarriaren erabilpena murrizteko neurrien azkartzea Euskal Hirigune Elkargoko 95 herritan. Adibidez, baratzeen ureztatzea 20:00ak eta 08:00ak artean bakarrik egin daiteke, baina soropilena, lorategiena, berdeguneena eta golko bereziena, berriz, guztiz debekatu dute. Kirol zelaiak, aldiz, ez dira debeku horretan sartzen, eta astean bi aldiz urezta daitezke, 22:00ak eta 06:00ak artean.

Garbiketari dagokionez, baldintzak «alerta» egoerako berdintsuak dira. Izan ere, ibilgailuen garbiketa guztiz debekatua dago oraindik ere, ez bada partikularrek etxean garbitzen dutenean edo horretarako eginak diren makinetan garbitzen denean. Etxe aitzinaldeen, teilatuen eta bide bazterren garbitzea ere debekatu dute, eta, aisialdiari dagokionez, etxeetako igerilekuen betetzea edo iturri publikoen urez hornitzea ezinezkoa da oraindik ere.

Neurriak ezartzeaz gain, prefeturak dei egin die herritarrei ur edangarriaren kontsumoari kasu eman diezaioten egunerokoan. Hurrengo lehorte batzordea datorren asteartean bilduko da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lezetxikiren Lagunak taldekoek ateratako argazki batzuk, Lezetxikoko galeria suntsituan. ©LEZETXIKIREN LAGUNAK

AHTaren tunel batek Lezetxikin kalteak egin dituela salatu dute

Xabier Martin

Aztarnategi baliotsuaren gertuko galeria bat suntsitu du tunelak, espeleologo batzuek dokumentatu dutenez. Euskal Herriko giza aztarnarik zaharrenak topatu dituzten lekua da Arrasateko koba
Osasun langile bat, atzo, Nafarroako Ospitale Unibertsitarioaren kanpoaldean. ©IÑIGO URIZ / FOKU

Osasunbideko gehiengo sindikalak grebara joko du, Sindikatu Medikotik bereiz

Ion Orzaiz

LAB, SAE, UGT, ELA, Afapna eta CCOOk hilaren 15erako egin dute deialdia. «Osasun publikoaren kalitatea eta lan baldintzak» hobetzea daukate xedetzat. Negoziazioa gobernuaren eta Sindikatu Medikoaren artean egin izana salatu dute
Bidaiari batzuk, Donostiako autobus geltokian. ©GOTZON ARANBURU / FOKU

Ibilbide luzeko autobusak doakoak dira jada ohiko bidaiarientzat Hegoaldean

Jone Arruabarrena

Berme bat ordaindu beharko da, eta gutxieneko bidaia kopuru bat egin
Euskal Herriko mugimendu feministaren agerraldia, atzo, Gasteizen. ©ENDIKA PORTILLO / FOKU

Zaintza sistema «eraldatzeko» mobilizatuko da mugimendu feminista

Edurne Begiristain

Lehen mugarria Martxoaren 8an ezarriko du Euskal Herriko mugimendu feministak. Zaintza «erantzukizun soziala» bilakatzea izango du helburu borroka dinamikak

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.