Hipotekentzako abalak ematea onartu du Espainiako Gobernuak

Kreditu Ofizialeko Institutuak etxeko hipotekaren %20 ordaintzeko abalak emango dizkie adingabeak dituzten familiei eta 35 urtetik beherako gazteei. Espainiako Ministroen Kontseiluan onartu dute, eta adierazi dute gazteei eta familiei zuzendutako laguntza dela: «Etxe bat erosteko kaudimena eta gaitasun ekonomikoa duten baina etxea erosteko beharrezkoa den lehen sarrera ordaintzeko ahalmenik ez daukaten horientzat izango da», Raquel Sanchez Garraio ministroak adierazi duenez.

Bankuek eskatu ohi duten lehenbiziko sarrera hori kopuru osoaren %20koa izan ohi da —%25eraino igo daiteke etxearen energia kalifikazioa D motakoa bada—, eta, neurri horrekin, Kreditu Ofizialeko Institutuak emango du %20 hori ordaintzeko abala, hamar urterainoko epean. 2.500 milioi euro bideratuko ditu. Abal horien bidez beste 50.000 etxe erostea espero dute.

Eskatzeko epea zabaldu du, 2025eko abenduaren 31ra arte, bi urte gehiago luzatzeko aukerarekin. Eskatzaileek, hala ere, baldintza batzuk bete beharko dituzte: besteak beste, 37.800 eurorainoko irabazi gordinak izatea gehienez urtean, eta hori halako bi eskatzailea bikote bat bada. Guraso bakarreko familiak ere kasu berezitzat hartuko dira.

Joan den abenduan hipoteka sinatu zuten herritarren kopuruak nabarmen egin zuen behera Hego Euskal Herrian, baina etxebizitza erosteko hipoteka gehiago sinatu ziren urtarrilean: 2.287. Iragan urteko datuekin alderatuta, %11,8ko igoera izan da. Halaber, handitu egin zen maileguan hartutako kapitala; 310 milioi iazko urtarrilean, eta, 354 aurten.

INE Espainiako Estatistika Institutuak argitaratutako datuen arabera, are handiagoa da aurreko hilarekin konparatuta dagoen koska: abenduko datuekin alderatuta, %37 hipoteka gehiago sinatu dira. Hala ere, gazteek eta haurrak dituzten familiek arazo gehiago izan ohi dituzte etxe bat jabetzan erosteko.

EAJ eta EH Bildu, kontra

EAJk eta EH Bilduk ere ez dute begi onez ikusi. EAJko Aitor Estebanek ez du uste aparteko eraginik izango duenik neurri horrek. EH Bildu kontra agertu da: «Bankuen, espekulatzaileen eta asko daukatenen mesederako izango da», Mertxe Aizpuruaren esanetan. Espainiako Gobernuan ere desadostasuna eragin du.