Madrilek ministro bat bidaliko du Gernikara estreinakoz: Felix Bolaños

Euskal herritarren oroimen kolektiboan leku berezia duen gertaera bat gogoratzeko eguna da gaur: Gernikako bonbardaketa. Elkarte memorialistek eta erakundeek urtero egiten dute ekitaldi bat Gernikan (Bizkaia), Francok agindutako sarraski hura ahanzturan eror ez dadin, eta aurten ere horrela egingo dute, 86. urtemugari lotutako ia astebeteko egitarau zabalaren barruan. Aurten, ordea, zerbait desberdina izango da: Espainiako Gobernuak, lehen aldiz, ministro bat bidaliko du Gernikara.

Madrilek hamarkada askoan ez ikusiarena egin ondoren, Felix Bolaños Espainiako Presidentetzarako eta memoria demokratikorako ministroa Gernikan izango da gaur, sarraski hartatik bizirik irten zirenen eta han hil zirenen omenez egin ohi den lore eskaintzan. 16:30ean izango da ekitaldi hori, hilerrian. Aurretik, sirena hotsak entzungo dira herri osoan (15:45) 1937ko bonbardaketa hasi zen orduarekin bat. Eta hilerriko ekitaldiaren ostean, kale antzerki bat izango da: Gernika garretan. Foru plazan izango da, 21:00etan. Gero, kandelekin ibilbidea egingo dute 21:30ean, Foruen plazatik abiatuta.

Eusko Jaurlaritzak uste du «norabide zuzenean egindako urratsa» dela Espainiako Gobernuak hartutako erabakia, baina Bingen Zupiria bozeramaileak azaldu du Gernikako bonbardaketari lotutako «barkamen ekitaldi bat» egin beharko lukeela Madrilgo gobernuak; esan du sarritan igorri duela eskaera hori Iñigo Urkullu Jaurlaritzako lehendakariak.

Beste estatuetan bezala

«45 urte baino gehiago joan behar izan dira Espainiako gobernu bat Gernikako ekitaldietara etortzeko», esan du Zupiriak. «Behin baino gehiagotan» eskatu du Urkulluk «keinu bat» Gernikako bonbardaketari lotua, bozeramaileak esplikatu duenez, eta begi onez hartu du Lakuak Pedro Sanchezen gobernuak hartutako erabakia; baina, Jaurlaritzarentzat, «barkamen ekitaldi bat» egiteko dauka oraindik Madrilek. Espainiak Gernikan gertatu zena «gaitzestea» funtsezkoa da Gasteizko gobernuarentzat. «Beste estatu batzuetako arduradun politikoek egindako zerbait da», gogorarazi du Zupiriak. Barkamen ekitaldi horiek egin direla erantsi du, iraganeko«indarkeriek gobernu ordezkari horiekin lotura zuzenik ez duten kasuetan ere».