Madril PPrentzat, Ciudadanosen eta Voxen botoen bidez

Azken ordura arte ibili zen negoziatzen PP, eta azkenean lortu du Jose Luis Martinez-Almeida Espainiako hiriburuko alkate izatea, hauteskundeetako irabazlea—hemeretzi zinegotzirekin— Mas Madrideko Manuela Carmena izan arren. Ostiralean itxi zuen akordioa PPk Ciudadanosekin, eta Begoña Villacis alkateorde izango da. Ondoren errazago lotu zuen PPk Voxen babesa, baina ez du argitu ultraeskuindarrek zer ardura postu izango dituzten.

Azken hauteskundeetan lortutako salba-gerrikoetako bati—Madrilgo erkidegoa da bestea— tinko eutsi dio PPk, bai baitaki Madrilgo alkatetza berreskuratzea berebizikoa zaiola, bai nolabaiteko hondoa jarri nahi badio alderdiaren azken urteetako gainbeherari, bai eutsi nahi badio Ciudadanosek borrokatzen dion Espainiako eskuinaren lidergoari.