Koronabirusa

Jardunari berrekiteko neurri berriak

Madrilek maskarak erabiltzera derrigortuko du, bi metroko tartea gorde ezin denetan; baita kalean ere. Araban, Bizkaian eta Gipuzkoan, herritarrak herrialdean zehar ibil daitezke jada.

Saltzaile bat Landabengo azokan (Iruñea).
Saltzaile bat Landabengo azokan (Iruñea). JAGOBA MANTEROLA / FOKU Tamaina handiagoan ikusi

Jon O. Urain - Paulo Ostolaza -

2020ko maiatzak 19

Konfinamendua arintzeko lehen fasean dago Hego Euskal Herria; Espainiako Gobernuak onartzekotan, baliteke gaur zortzi igarotzea bigarren fasera. Haatik, lehen fase horretako neurri batzuk arindu zitzaizkien atzo Arabako, Bizkaiko, Gipuzkoako eta Nafarroako biztanleei. Aldiz, iluntzean, beste batzuen berri eman zuen Madrilek, nahiz eta agindua bera eta xehetasunak datozen egunetan argitaratuko dituen: derrigortu egingo du maskaren erabilera, bi metroko tartea gorde ezin den kasuetan; baita kalean ere.

Maskarak derrigorrez erabili beharko dira?

Espainiako Gobernuak eta erkidego autonomoetako osasun sailburuek atzo iluntzean adostu zuten maskarak derrigorrezkoak izango direla garraio publikoan —orain arte bezala—, leku itxietan, eta baita edozein leku publikotan ere, ezin bada bi metroko tartea gorde. Datozen egunetan argitaratuko dute agindua, eta orduan emango dituzte xehetasunak.

Ordutegi berberak?

Oro har bai. 10.000 biztanletik beherako udalerrietan, ordea, kendu egingo dute soilik ordutegi jakin batzuetan kalera irteteko agindua. Ordutegi horiek maiatzaren 2an ezarri zituzten, konfinamendutik pixkanaka ateratzeko, eta 5.000 biztanletik beherako herri eta hirietan egon dira indarrean azken asteetan. Sanchezen gobernuak herenegun iragarri zuen atzo sartuko zela neurri hori indarrean, baina, Madrilek oraindik ez duenez Espainiako Aldizkari Ofizialean argitaratu, Jaurlaritzak eta Nafarroako Gobernuak 5.000 biztanletik beherako langari eutsi die Foruzaingoaren, Ertzaintzaren eta Udaltzaingoaren jardunerako emandako irizpideetan. Guztira, 36 udalerritako biztanleei eragingo die horrek.

Tamaina horretatik gorako herrietan ez dago aldaketarik: 06:00-10:00 eta 20:00-23:00 tartea ariketa fisikoa egiteko edo paseatzeko, 12:00-19:00 tartea 14 urtetik beherakoentzat, eta 10:00-12:00 eta 19:00-20:00 tarteak 70 urtetik gorakoentzat eta menpekotasunak dituztenentzat.

Zer lokal eta saltokik ireki ditzakete ateak?

Larrialdi egoera ezarri zenetik ateak irekitzerik izan ez duten saltoki guztiek. Bakarra da bete beharreko baldintza: lokala 400 metro karratukoa edo gutxiagokoa izatea. Muga hori gainditzen badute, ordea, bezeroentzat erabilgarri dagoen esparrua mugatzeko aukera izango dute dendek.

Zabaldutakoan, okupazio maila gehienez %30ekoa izango da saltokietan; arduradunek gutxienez bi metroko distantzia bermatu beharko dute bezeroen artean, eta 65 urtetik gorakoek lehentasuna izango dute.

Beherapenak bai?

Saltoki guztiei beherapenak edo bestelako promozioak egiteko debekua ere kendu die Espainiako Gobernuak. Baldintza bakarra jarri die: jende pilaketarik ez sortzea. Hori gertatzen bada, saltokiek bertan behera utzi beharko dituzte eskaintza bereziak.

Terrazek zer ordutegi?

Eusko Jaurlaritzak Ertzaintzari eta Udaltzaingoei bidalitako txostenak argi dio: udal bakoitzak erabakiko du ostalarien terrazek zer ordutegi bete beharko duten. Ez dago gai horrekiko jarraibide orokorrik, eta, beraz, herritik herrira alda liteke ordutegia.

Senideak bisitatu ditzaket ala ez?

Kasuan-kasuan. Bisitatu beharreko pertsona 65 urtetik gorakoa bada, menpekotasunen bat badu edo antzeko beste beharren bat, bai. Lekualdatze horiek haurrak zaintzeko egitea ere posible izango da aurrerantzean. Horrela dio Ertzaintzari eta Udaltzaingoei bidalitako txostenak: «Autonomia Erkidegoaren barruan, beharrizana badago, ilobak zaintzera joan ahal da edo ilobak beste leku batera eraman ahal dira, senideek zain ditzaten».

Etxean bildu gaitezke?

Araba, Bizkai eta Gipuzkoan, ez. Ezta elkarte gastronomikoetan edo gazteen lokaletan ere. Maiatzaren 11tik aurrera, lagun edo senideekin gelditzea posible dute Lapurdiko, Nafarroa Behereko, Zuberoako herritarrek —100 kilometroko erradioan eta muga igaro gabe— eta Nafarroakoek —probintzia barruan bada—.

Herritik irten naiteke?

Herrialdearen mugak errespetatzen diren bitartean, bai; paseatzeko edo jarduera fisikoa egiteko probintzia barruan ibiltzea baimendu dute. Hori bai: jarduera hori ohiko bizilekua dagoen herritik kanpo egin nahi bada, lehendik ezarritako ordutegien mugak errespetatu beharko dira; hau da, 6:00-10:00 bitartean edo 20:00-23:00 bitartean egin beharko da.

Beraz, herritik kanpoko mendietara edo naturaguneetara joatea posible da. Baimendu dituzten beste jarduera batzuk arrantza, ehiza eta aisialdirako itsasoko nabigazioa dira, betiere segurtasun eta garbitasun baldintzak betetzen diren bitartean. Kirol zentro pribatuetara joatea ere posible da, aurrez ordua hartuta.

Bigarren etxebizitzara joaterik badut?

Hori ere, lurralde historikoaren mugen barruan, baimenduta egongo da aurrerantzean, baita bertan gaua igarotzea ere.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Covid-19 daukaten gaixoak zaintzen duten bi erizain besarkatzen 55 egun gaixo zeraman gizon bat sendatzean. ©Andoni Lubaki / Foku

Koronabirusaren azken datuak

Berria

Euskal Herrian 31.166 gaixok eman dute positibo guztira, koronabirusa atzemateko probaren bat eginda. Horietatik 2.150 hil dira. Grafikoak, albiste barruan.

 ©BERRIA

«Transmisio komunitario bat daukazunean, ezin da telefono bidez kudeatu»

Jon Ordoñez Garmendia

Epidemia betean harrapatu dute hauteskundeek Ordizia, eta kezkatuta dago Ezenarro. Arriskuaz ohartarazi arren, neurri bereziak hartuta egingo dituzte bihar. Erakundeen babesa eta mahai tekniko bat sumatu ditu faltan.

Jendea kalean asteon, Gasteizen. ©JAIZKI FONTANEDA / FOKU

Tutera eta Ordiziako kasuen oldarraldien harira, adi ibiltzeko eskatu dute

Arantxa Iraola

Sorburua Ordizian duten 69 kasu agertu dira; Tuterakoarekin zerikusia dutenak 31 dira. «Transmisio komunitarioa» egiaztatzeko dago beste hainbat tokitan; ikertzen ari dira

Bi lagun, terraza batean eserita, Orion. ©JON URBE / FOKU

Nork agindu tabernetan

Aloña Beraza Peña Irati Urdalleta Lete

Ordiziako taberna batetik zabaldutako fokuak piztu ditu alarmak aste honetan. Su gehiago ere ari dira pizten, Tuteran, Gasteizen... Tabernariak eta kudeaketan dabiltzanak kezkatuta daude.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna