Albistea entzun

Koronabirusa

Adituek adinekoei hirugarren dosia jartzeari eman diote lehentasuna

Oro har, umeak txertatzearen alde egin dute BERRIAk kontsultatutako adituek. Eskatu dute ez ahazteko mundu mailako arazoa dela

Irati Urdalleta Lete -

2021eko azaroak 27

Txertoa gero eta jende gehiagorengana iristeko bidea ireki dute: EMA Sendagaien Europako Agentziak 5 eta 11 urte bitarteko umeak txertatzea onetsi du, Pfizerren bi dosi jartzea alegia. Batzuei lehengo bi dosiak, eta besteei, hirugarrena: Ipar Euskal Herriko 18 urtetik gorakoek hirugarren dosia hartu beharko dute osasun ziurtagiria edukitzeko; Hego Euskal Herrian, berriz, 60 urtetik gorakoek izango dute hartzeko aukera. Adituen irudiko, birusaren aurrean duten babes maila areagotzeko lagungarri izango da.

MIREN BASARAS EHUko Mikrobiologia irakaslea
«Umeen artean ez da ikusi txertoaren albo ondorio larririk»

60 urtetik gorakoak eta gazteagoak, zaurgarriak badira. Horiek izan behar dute hirugarren dosia jasotzen lehenak Miren Basaras EHU Euskal Herriko Unibertsitateko Mikrobiologia irakaslearentzat. 18 urtetik gorako denei jarri aurretik, berriz, eskatu du dosiak mundu osoan zabaltzeko.Halaber, «ezinbestekotzat» du umeak txertatzea, «pandemia kontrolatzeko». Eta lasaitasun mezua helarazi du: «Ez da ikusi albo ondorio larririk; beraz, segurtasuna bermatuta dago. Hori esan dute sendagaien agentziek».

RAFAEL BENGOA Osasun politiketako nazioarteko aholkularia
«Lehentasuna helduenek izan behar dute»

Txertoa jartzeko lehentasunen ordena argi du Rafael Bengoa osasun politiketako nazioarteko aholkulariak: 60 urtetik gorakoen txertaketa bizkortzea, txertatu gabekoak konbentzitzen saiatzen segitzea, umeei eta gazteagoei jartzea hirugarren dosia. «Lehentasuna birus honek gehien mehatxatzen dituenek izan behar dute; alegia, helduenek». Halere, umeak «prebentzioz» txertatzearen aldekoa da, azaldu duenez, zenbaitek ospitaleratu behar izaten dutelako: «Askoz okerragoa da hori txertoaren nahi gabeko edozein ondorio txiki baino».

ANA GALARRAGA Elhuyarreko zientzia dibulgatzailea
«Umeei txertoaren babesak ez die abantaila nabarmenik ematen»

Ana Galarraga Elhuyarreko zientzia dibulgatzaileak bi maila bereizten ditu txertoaren onurez hitz egiteko orduan: populazio orokorra eta norbanakoak. Esan duenez, populazio mailan, Israelen argi ikusten da hirugarren dosiak laguntzen duela izurria kontrolpean izaten. Baina hemengo baldintzak desberdinak dira: han txertatu gabekoen ehunekoa handiagoa zen hirugarren dosia jartzen hasi zirenean hemen baino. Norbanakoei dagokienez, adinekoengan jarri du fokua: «Zenbat eta hobeto babestuta egon, hobe». Hortaz, orokortu behar al da hirugarren dosia? «Ez daukagu ebidentziarik esateko populazio orokorrarentzat egokia eta beharrezkoa dela». Umeekin ere, antzekoa: maila indibidualean ez du uste aparteko onurarik izango dutenik; bai, ordea, populazio mailan: «Babes horrek ez die abantaila nabarmenik ematen, ez direlako gaixotzen; populazio mailan interesgarria da».

FERNANDO GARCIA Epidemiologoa eta bioetika gaietan aditua
«Hirugarren dosia positiboa da populazio osoarentzat»

Madrilgo Osasun Publikoaren Elkarteko epidemiologoa da Fernando Garcia, eta bioetika gaietan aditua. Uste du indartzeko dosiak antigorputzak areagotzen dituela, jaitsi egiten dituela kasu larriak, eta eraginkorra dela, batez ere transmisio komunitarioa dagoenean: «Positiboa da populazio osoarentzat, ez adinekoentzat bakarrik». Horrek ez du esan nahi, ordea, denei eman behar zaienik, eta munduko ikuspegia ez galtzea eskatu du: «Europar bati ematen diogun dosi hori ez diogu ematen afrikar bati, eta eman nahi genioke». Zalantzatiago ageri da umeen txertaketaren inguruan, gaur-gaurkoz informazioa falta dela iruditzen baitzaio arriskuak eta onurak zenbaterainokoak diren neurtzeko. «Bitartean, agian, zuhurtziak itxarotea gomendatzen du».

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Zigoitian bi emakume hil ziren istripu batean, kamioi batek haien autoa jota. ©DAVID AGUILAR / EFE

Euskal Herriko errepideetan 85 lagun hil dira istripuz urtebetean

Irati Urdalleta Lete

Pandemiak 2020an eragindako geldialdiaren ostean, 2021ean gidariak berriz atera dira errepidera, eta, horrekin batera, %20 ugaritu dira heriotzak. Hildakoen %82 gizonezkoak izan dira
<b>ZIUak, beteago.</b> Osasun langile bat gaixo bat artatzen, Gurutzetako ospitaleko ZIUan. ©MARISOL RAMIREZ /FOKU

Birusarekin 129 lagun zendu dira Hego Euskal Herrian aste bakar batean

Edurne Begiristain

Joan den urteko otsailaren erdian erregistratutako datuen parekoa da. 180 eri daude ZIUetan, larri. Hirugarren dosia 30-39 adin tartekoei zabaldu die Osakidetzak
2021 urteko balantze korporatiboa

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.