Albistea entzun

Telesailak

Heriotzaren mamu eternala

Sei ataleko 'El Estado contra Pablo Ibar' dokusaila estreinatu du HBOk, Irusoin euskal ekoiztetxearekin lankidetzan
HBO Tamaina handiagoan ikusi

Mikel Yarza Artola -

2020ko abenduak 5

Kazetariak, Polizia agenteak, Estatuko fiskaltza, abokatuak, senideak... denak entzun daitezke Pablo Ibarren inguruan hizketan. Denak, Ibar bera izan ezik. Istorioaren protagonista bazterrean utzi du Olmo Figueredo zinemagile sevillarrak, eta hori da, ziurrenik, haren lan berriaren ezaugarririk esanguratsuenetako bat.

Dokumental estiloko telesail bat da El Estado contra Pablo Ibar, eta sei ataletan hautu seinalatu hori egin du Figueredok: kondenatu ezaguna erdigunetik alboratu du, eta lehen lerrora ekarri auziaren testuingurua. Xehetasun handiz kontatu du Ibar heriotzaren korridorera eraman zuen gertakari eta erabaki katea. Baina, auzibidearen errepasoa egiteaz gain, inoizko lekukotzarik gordinenak ere bildu ditu, Nickelodeoneko biktimen senideetatik hasi eta Zestoako Ibar familiarenganaino.

Bide horretan, ohiko hurbiltze gizatiarretik ihes egin du Figueredok, eta dokumental generoa besarkatu du bete-betean. Erritmo biziko kontaketa da; garaiko eta egungo gertakariak inoiz argitaratu gabeko artxiboko irudi ikusgarriekin jantzi ditu, eta, batez ere, neutraltasuna mantendu du.

Ez ditu epaitu 25 urteren ostean oraindik argitu gabe dauden kontuak, ahalik eta modu inpartzialenean erakutsi baizik. Oso bestelakoa izan zen iazko En el corredor de la muerte. Movistar+ plataformak lau ataleko telesail batean eraman zuen fikziora Ibarren auzia. Kondenatuaren eta haren senideen begirada izan zen han landu zuten bakarra.

Ibarrek kolpe gogorra jaso zuen iaz, bigarren epaiketa galdu, eta, berriz ere, bizi osoko kartzela zigorra jasotzean. Testuinguru horretan, ez dirudi HBOren dokumentalak auziarekiko interesa berpiztu eta errealitatea baldintzatzeko gaitasunik izango duenik, Netflixen true crime estiloko hainbat kasutan gertatu izan den moduan.

Hala eta guztiz ere, Figueredorena da Ibarren auziaz inoiz egin den ikus-entzunezko azterlanik osatuena, eta ikuslea bultza lezake lerroburuak horrenbeste alditan bete dituen kasu honen bigarren irakurketa sakonago bat egitera. Sortzaile andaluziarrak atea irekita utzi die etorkizuneko galderei eta gertakariei, eta, akaso, horiek garatu ahala, bizi berri bat har lezake dokumentalak ere.

Olmo Figueredoren lanak badu bestelako interesgune bat ere. HBOren proiektu horren atzean dago Irusoin euskal ekoiztetxea, Garaño, Goenaga eta Arregiren ibilbide arrakastatsuko ohiko bidelaguna. Bada, hain justu, Figueredo da Oscarretarako bidean den La Trinchera Infinita filmeko ekoizleetako bat.

Norbanako biren artean gertaturiko hilketen misterioa alde batera utzita, El Estado contra Pablo Ibar dokusailak AEBetako sistema judizialaren pitzadurak ere azaleratu ditu. Telesaila Donostia Zinemaldian estreinatu ostean heldu da orain HBOra. Oraingoz, erreferentziazko plataformak Espainian eta Portugalen emango du soilik. Ikusteko dago dokumentalaren kalitatea nahikoa izango ote den auziak berriz ere AEBetako ikus-entzuleen arreta bereganatzeko.

'EL ESTADO CONTRA PABLO IBAR'
Sortzailea: Olmo Figueredo.
Pertsonak: Pablo Ibar, Kandido Ibar, Barbara Brush, Casey Sucharski, Deborah Bowie.
Herrialdea: Espainia.
Urtea: 2020. Non ikusi: HBO.
Atal bakoitzaren iraupena: 60 minutu.
Generoa: Krimena. Dokumentala.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Maddalen Arzallusek eta Xabier Sukiak aurkeztuko dute 2022ko lehen saioa ETB1en: <em>Biba 2022!</em>. ©EITB

ETBren kanpaiak, Gasteiztik

Urtzi Urkizu

ETB1en Ainhoa Etxebarriak, Aitziber Garmendiak eta Yerai Diezek aurkeztuko dituzte kanpaiak

 ©GORKA RUBIO / FOKU

«Ekialdean berariaz zaindu dute xakea»

Gorka Erostarbe Leunda

Jolasa eta jokoa. Lehia eta estrategia, baina baita zientzia, artea, poesia eta bizitza ere. Guztiak islatzen ditu xakeak. Alderdi horiek bildu ditu Berasaluzek '64 begirada. Xake taularen zuri-beltzean' lanean.
Daliren maskara biral egin da. ©NETFLIX

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.