ENBAXADA BILA

Zigorra eta humanitatea

Martxelo Otamendi - BERRIAko zuzendaria

2020ko apirilak 5

Garrantzitsua da, garrantzitsuena seguru asko, koronabirusak sortu duen egoera honetara ahul sartu ziren herritarrak (ez naiz osasunaz ari) ez ateratzea sartu aurretik zeuden baino ahulago eta babesgabeago. Krisi askotako ezaugarrietako bat baita hori, lehendik gaizki zegoena, piramidearen oinarriaren azpitik alegia, okerrago, geratzea. Horixe gertatu zen lehenago sortu baina 2008an kolpea eman zigun krisiarekin. Haren ondoren pobreak pobreago, eta aberatsak aberatsago, ondorio horiek saihesteko neurriak ez zituztelako hartu nahi izan.

Oso exijenteak izan behar dugu eginkizun horretan; nahiz estatuek kaltea arintzeko dirua jarri, badakigulako mailarik baxuenean daudenak, askotan, laguntza publikoen zirkuitu horietatik kanpo geratzen direla. Ez nahita, noski. Baina badakigu gertatzen dela, eta ezin dugu etsi laguntzak denongana iristeko ahalegin horretan. Ez ditzagun, hortaz, iraganeko akatsak errepika.

Presoak dira, salbuespenak salbuespen, beheko maila horietan talde garrantzitsua osatzen dutenak. Gizartetik kanporatuak, ikusezin bihurtu ditugu, zigorrean oinarritutako kodea nagusitu delako. Humanitate irizpideek eta mendeku irizpideek talka egiten dutenean, ia beti mendekuak irabazten du.

Egoera gutxi egongo dira koronabirusak eskaini diguna bezalakoa, presoen tratamenduan ekuazioa irauli eta humanitatea jartzeko mendekuaren gainetik. Noiz bada, orain ez badugu egiten? Gure herrietako preso politikoekin betiko salbuespena aplikatu dute, salbuespena zurituko duen arrazoirik ez dagoenean. Zuenean kalera egunero ateratzen ari diren eta kartzelara lo egitera zintzo itzultzen diren presoek eta, gurean, larriki gaixo daudenek, nora ihes egingo dute birusa jotzen ari den egunotan?

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.