Albistea entzun

HIZPIDEAK

Pirinioak

Iñaki Petxarroman -

2022ko uztailak 2 - @petxarroman

Ez du bilaketa eta arakatze handirik egin behar izan kazetariak bere ustea egiaztatzeko. Ingelesezko, gaztelaniazko eta frantsesezko Wikipedietan bilaketa erraz bat eginda, gure gertuko munduan Pirinioen inguruan duten ezagutza eta ikuspegia zein den berretsi du berehala: mendiok Frantziaren eta Espainiaren arteko muga «naturala» egiten dutela dio Espainiako Wikipediak. Antzeko hitzak besteetan ere.

Bi estatuen arteko gatazketan rol bat jokatu dute Pirinioek, nola ez. XVII. mendean bertan sinatu zuten 30 urteko gerraren amaiera ekarri zuen hitzarmena. Faisaien uhartean, Bidasoa euskal ibaiaren erdi-erdian. Geroztik, sei hilabetez Frantziarena da uharte txikia, eta beste sei hilabetez Espainiarena.

Baina Pirinioek, banatu baino gehiago, elkartu egiten dituzte Euskal Herria eta Katalunia. Mendien bi magaletan bizi dira euskaldunak eta katalanak, eta, mendiak, bereizi ez, eskua luzatu die garai gatazkatsuetan, erbestera joateko edo babesa bilatzeko uneetan.

Mendiotan asko ibili direnak erraz jabetu izan dira zenbateraino diren Auñamendiak euskaldunen eta katalanen mendiak. Eta zeinen gertu dauden Euskal Herria eta Katalunia, Pirinioetako lerro gorabeheratsuari jarraikiz.

Gaur elkarri eskua emango diote Euskal Herriak eta Kataluniak. Euren etorkizunaren jabe izan nahi dutela esango diote munduari. Pirinioetako ilunpean, argi izpi bat piztuko diote burujabetzari.

Sareko BERRIAzalea:

Udazkenean, BERRIAlagun egiteko pausoa eman dezazun, eskaintza bat egin nahi dizu BERRIAk. Herri baten kulturaren plaza da BERRIA. Kultur egitasmo, dinamika eta ekitaldi anitzen erakustoki. Euskal kulturaren inguruko informazioaren plaza handia. Azaroan eta abenduan, Euskaraldiak, Bertsolari Txapelketa Nagusiak eta Durangoko azokak hartuko dituzte, besteak beste, BERRIAren orrietako asko, paperean eta webgunean.

Albiste asko irakurriko dituzu, segur aski webgune honetan bertan. Eta eskari bat egin nahi dizugu: har ezazu konpromisoa irakurtzen duzunarekin. Irakurleen babes ekonomikoa funtsezkoa da BERRIAren etorkizuna ziurtatzeko.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...