No tinc por (Ez dut beldurrik) lelopean, manifestazioa egingo dute etzi, Bartzelonan, joan den osteguneko atentatuak gaitzesteko. Bartzelonako Udalak eta Kataluniako Gobernuak deitu duten manifestazio horretan egongo dira Uxue Barkos Nafarroako Gobernuko lehendakaria eta Iñigo Urkullu Eusko Jaurlaritzakoa. EH Bilduk ere ordezkaritza bat bidaliko du; Maddalen Iriarte eta Pello Urizar. Arratsaldeko 18:00etan abiatuko da, eta buruan mossoak, udaltzainak eta gizarte zibileko ordezkariak joango dira.
Gaur da astebete atentatua izan zela. Ada Colau Bartzelonako alkateak jakinarazi du, bada, erasoen lekuan memorial bat jarriko duela biktimen omenez. Bartzelonako Udaleko Segurtasun Batzordeak egindako bileraren ostean egin zuen iragarpena Colauk. Ramblen erabilera plan berezia segurtasun egoera berrira egokitu beharko dela zehaztu du udal agintariak, eta mossoen eta udaltzainen presentzia ugarituko dutela; hiriko hainbat kale soilik oinezkoentzat uztea eta zutoin trabagarriak jartzea ere aztertuko dute.
Alerta, Rotterdamen
Alah-Las musika taldearen kontzertua bertan behera utzi zuten bart iluntzean, Rotterdamen. Espainiako Poliziak abisu bat emana zion Herbeheretako Poliziari eta, horren ondorioz, Espainiako matrikula zuen furgoneta bat atzeman zuten, kontzertu hori egitekoa zen tokiaren inguruan. Iturri batzuen arabera, lehergailuak izan zitzakeen ibilgailuak, eta gidaria atxilotu egin zuten.
Katalunian, atxilotuetako batek epaileari deklaratu dio lehergailuak lehortzeko zain zeudela, Familia Santuaren elizan zartarazteko, Bartzelonan. Ika-mika, berriz, polizia sindikatuen artean piztu da; AUGC eta SUP Guardia Zibilaren eta Espainiako Poliziaren sindikatuek asteartean salatu zuten ikerketatik «baztertu» dituztela. FEPOL mossoen sindikatuak, berriz, «miserabletzat» jo du atentatuak independentziari buruzko eztabaidarekin lotzea.
Atentatuak Katalunian. Islamofobia
Barkos eta Urkullu larunbateko manifestazioan izango dira
Iruzkinak
Ez dago iruzkinik
Ordenatu