Errublo gehiago Georgiarentzat

Lau urteko etenaldiaren ondoren, Georgiaren eta Errusiaren arteko lehen hegaldi zuzena maiatzeko azken astean abiatu zen Moskutik. Errusiako Gobernuak 2019. urtean erabaki zuen hegaldi zuzenak debekatzea, Tbilisin Errusiaren aurka gertatutako manifestazio eta istiluen ondoren. Une honetan, Putinen gobernuak debekua bertan behera zergatik utzi duen azaltzeko hainbat arrazoi aipatu dira: Georgiako oposizioak dio Putinek gobernuari egindako oparia izan dela; alegia, Ukrainari armak ez emateagatik eta Mendebaldearen zigorrekin bat ez egiteagatik turismo errusiarraren iturria berriro ireki dutela Kremlinetik. Beste batzuek diote Putinek Ukraina galdu eta Asia Erdialdeko herrialde gehienekin harremanak hoztu ondoren, lagun bila dabilela Errusiako presidentea, eta hori egiteko Georgiarekin harremanak hobetu nahi dituela. Hegaldi zuzenak baimentzeaz gain, Errusian sartu nahi duten georgiarrei bisatua eskatzeko baldintza ere bertan behera uztea erabaki du Errusiako Gobernuak. Errusiako komunikabideen aburuz, georgiarren eta errusiarren bidaiak erraztu nahi ditu Moskuk. Besterik ez.

Arrazoiak arrazoi, Georgiako Gobernuak pozik hartu du erabakia onura ekonomikoak ekarriko dizkiolako. Europako Batasunak, ordea, gogor kritikatu du Tbilisiko gobernua, EBk Errusiako hegazkinei ezarri dien debekua ez duelako mantendu. Gainera, Errusiako hegazkinei ateak irekitzearekin, EBn sartzeko prozesua arriskuan jarri duela ohartarazi dio. Ikusteko dago ohartarazpenak eraginik izango duen prozesua lehenagotik ere arriskuan baitzegoen. Hots, joan den urtean EBk baztertuta utzi zuen Georgia hautagai izateko herrialdeen zerrendan; «hautagai posiblea» estatusa eman zion Georgiari. Ukraina, Moldavia eta Bosnia eta Herzegovina, ordea, «hautagai» izendatu zituen. Ukrainak eta Moldaviak bezala, Georgiak ez du bere lurraldearen zati bat kontrolatzen —%20 Errusiaren okupaziopean dago—. Gainera, ustelkeria eta garapen ekonomiko kaskarrak dituzte hirurek, baina Bruselak Ukraina eta Moldavia lehenetsi ditu. Diru laguntzak banatzeko orduan ere agerikoa da arrakala. Dena den, urruntzea ez da alde batekoa izan; Tbilisiko gobernuak ere Europako Batasunak eskatu dizkion erreformen aurkako hainbat neurri hartu ditu; garapen demokratikoen alorrean, bereziki. Europako Batasunak Georgiaren hautagaitzari atea erdi ireki bakarrik egin dionean etorri da Moskuren oparia. Kaukasoko herrialde horretako hamar biztanletik zortzik EBko kide izan nahi dute.

Sobietar Batasuna desagertu zenetik, bost aldiz eten dira Errusiaren eta Georgiaren arteko hegaldi zuzenak: bitan Georgiako Gobernuaren aginduz, eta gainontzekoetan Moskuk aginduta. Inork daki abian jarri berri den Mosku eta Tbilisiren arteko aire konexio zuzenak, oraingoan, zenbat denbora iraungo duen. Hegaldi zuzenei esker, uda honetan milaka turista errusiarrek eta azken hilabeteetan Errusiatik alde egin duten erbesteratuek elkarren ondoan gastatuko dituzte errubloak Itsaso Beltzeko hondartzetan eta Kaukasoko mendietan. Errusian bizi diren 100.000 georgiarrei dagokienez, hegazkinik aldatu gabe eta txartel merkeagoekin, jaioterrira maizago bidaiatuko dute Errusian urtean zehar irabazitako errubloak inbertitzeko. Errublo horiei guztiei esker, Georgiako ekonomiak gora egiten jarraituko du.