Errefuxiatuak Belgikan

Belgikako Gobernuak eman dituen datuen arabera, iaz 100.000 migratzaile erregistratu zituzten. Kopuru hori da urte baten sekula neurtu duten handiena. Horietatik hiru heren ukrainarrak izan ziren. Goizean goiz autobusetan eta metroan ikusten ditut; bereziki emakumeak, seme-alabak eskolara eramaten. Gehienek errusieraz hitz egiten dute euren artean. Ez naiz ezer galdetzera ausartzen, baina adi entzuten ditut. Euren elkarrizketetan eskolako ekimenei buruz edo gauzak merke erosteko dendez aritzen dira, eta frantsesez hitzen bat ere esaten dute, hemen hilabeteak daramatzaten seinale. Belgikan jasotzen ari diren laguntzaren inguruko kexarik ez dut entzun oraingoz. Belgikara milaka ukrainar etorri direnetik, ukraineraz hainbat telebista kate ikusteko aukera daukagu. Halaber, irrati-telebista publikoak ukrainerara itzultzen ditu errefuxiatuei buruz kaleratzen dituen albiste guztiak. Denda handietan ere zerbitzuei buruzko informazioa ukrainerazidatzita eskaintzen dute, eta matrikulan U hizkia duten kotxeei ez zaizkie aparkalekuetarako arauak aplikatzen. Lau ukrainarretik hiru etxebizitzetan bizi dira; gainontzekoak, beraientzat espresuki ireki duten asilo zentro baten.

Joan den urtean Belgikara iritsi ziren beste migratzaileen herena afganiarrak, siriarrak, palestinarrak eta burundiarrak ziren. Kaleetan ez ditugu ukrainarrak bezain erraz identifikatzen. Batetik, asiloa eskatzen dutenean, hamarretik zortzi errefuxiatu zentroetan sartzen dituztelako. Bestetik,komunikabideetan Afganistango eta Siriako egoera lazgarrien berri ematen ez dutenez, herritarrak beren sufrimenduarekin sentsibilizatuta ez daudelako. Asilo zentroetan tokirik ez dagoenean, ahaztutako gerretako iheslariek kalean egiten dute lo, eta hilabeteak daramatzate egoera horretan. Ondorioz, FEDASIL-ei, Belgikako asilo sistema kudeatzen duen agentziari, eguneko sei isun jartzen dizkiote nazioarteko babesa eskatu dutenen eskubideak urratzeagatik; hain justu, kalean lo egin duen pertsona baikotzeko 5.000 euroko isuna ezarri diote Belgikako Gobernuari. Errefuxiatuen egoera lazgarriak lotsagarri utzi du Belgika Europako Batasunean. Hala ere, gobernuak ez du lotsarik; hau da, gobernu federalak dio errua asilo eskatzaileena dela; Belgikara etorri direlako jakinik hemen migratzaileak eta errefuxiatuak artatzeko sistema gainezka dagoela. Negutik babesteko, mila errefuxiatuk eraikin bat okupatu dute Bruselan. Europar Kontseiluak salatu du bertako baldintzak Libiako kanpamentuetakoak baino okerragoak direla.

Belgikak asilo eskatzaileekiko eskuzabala izateko tradizioa dauka. Dena den, azkenaldian gauzak asko aldatu dira hemen, Europako Batasuneko beste herrialde askotan bezala. Hain zuzen,2015ean hasi ziren aldatzen, errefuxiatu olatuaren ondoren. Gobernu federalak eta Flandriako Gobernuak asilo politikak eta migratzaileentzako laguntzak gogortzen hasi ziren, Flandrian eskuin muturra hauteskundeetan gora eta gora egiten ari zela. Ukrainarrek , zorionez, ez dute Belgikan gertatu den aldaketa sumatu. Izan ere, 2015. urtearen aurretik errefuxiatuei ematen zitzaien pareko laguntza duina jasotzen ari dira, momentuz.