Afrikako futbola

Afrikako selekzio bakar bat ere ez zen final-zortzirenetara iritsi 2018an, baina Qatarren bi iritsi dira: Senegal eta Maroko. Nahiz eta Afrikako futbolak talentu eta gaitasun fisiko handia izan duen beti, oinarri taktikorik gabeko talde kaotikoak izatea leporatu zaie askotan. Biek estereotipo horiek amaitu nahi dituzte.

Senegalek Afrikako Nazioen Kopa irabazi zuen lehen aldiz otsailean. Horregatik, Qatarren lan ona egingo zuela espero zen, baina bere jokalaririk garrantzitsuena falta zaio: Sadio Manek min hartu zuen. Gaur, Senegalek Ingalaterraren aurka jokatuko du, eta zigortuta dagoen Idrissa Gana Gueyeren hutsuneari aurre egin beharko dio ere bai.

Ligaxkan ikusi dugun bezala, Gueye, taldeko erdilaririk defentsiboena, aurrelarien lerroan kokatzen da aurkariaren jokaldia hasten denean. Horrela, pase lerroak ixteaz gain, erdigunean nagusi dira kopuruan. 4-3-3 horrek aukera gehiago ematen die baloia zelaiko eremu altuetan berreskuratzeko. Lapurtu ostean, I. Sarr ezker hegalarekin jokatzen dute. Ingalaterrak, Herbehereek eta Ekuadorrek bezala, bi jokalari bakarrik kokatzen ditu oinarrian; beraz, Senegalek bilatu behar izango du nor ariko den Gueyeren ordez. Inoizko lanik onena berdin dezake: final-laurdenak jokatu zituen 2002an.