Zaintzarako baimen gehiago ematen dituen legea onartu du Madrilek

Espainiako Gobernuko Ministroen Kontseiluak Familien Legea onartu zuen atzo. Bertan, kontziliaziorako neurriak aitortu dituzte: adibidez, zaintzarako hiru baimen gehiago izango dira. Legea ez da behin betikoa, eta tramiteekin jarraitu beharko du, Espainiako Kongresuan.

Kontziliazioari dagokionez, testuak zenbait neurri jasotzen ditu. Adibidez, senideren bat edo bizikideren bat zaintzeko, bost egun ordainduko baimena onartzen du, «istripu, gaixotasun larri, erietxeratze eta etxean zaintza behar duten kirurgia kasuetarako». Gainera, urtean lau egunez baimen bat hartzeko aukera egongo da «ezinbesteko kasuetan», eta zortzi asteko baimen ordaindu gabekorako eskubidea ere aitortzen die 8 urte baino gutxiago dituzten umeen gurasoei. Azkenik, diruz ere lagundu nahi dituzte familiak. Horretarako, 3 urte baino gutxiagoko umea edukitzeagatik emakume langileek hilean kobratzen duten ehun euroko laguntza langabezian daudenei edo erditzetik 30 egun kotizatu dituztenei ere ordainduko diete.

Familia ugarietan ere, aldaketak. Aurrerantzean, «haurrak hazteko laguntza handiagoa behar duten familiak» izango dira. Gainera, orain artekoek ez ezik, beste familia batzuek ere kategoria hori lortuko dute: esaterako, bi seme-alaba edo gehiago dituzten guraso bakarrekoek, indarkeria matxista jasan duten eta bi seme-alaba edo gehiago dituzten emakumeek, eta bi ume eduki eta guraso edo seme-alabetako batek elbarritasunen bat dutenenek Horietaz aparte, «kategoria berezikoak» izango dira lau ume baino gehiago dituztenak, eta hiru seme-alaba eduki eta erditze anizkoitza izan dutenak edo diru sarrera txikiak dituztenak.

Izatezko bikoteen erregistroaere egingo dute, eta zenbait eskubide aitortuko dizkiete: adibidez, hamabost eguneko baimena izango dute erregistratzeagatik. Gainera, ezkondu gabe dauden bikoteei dagokienez, haurdun egon ez den pertsonak ere izango du aukera haurrak erregistratzeko.

Beste zenbait eskubide ere jasota daude dokumentuan. Hala nola aitortu eta babestu egiten dituzte LGTBI kolektiboko pertsonek osatutako familiak, kideren batek elbarritasuna duten familiak, harrera familiak... Gainera, haurrak harreran hartzen dituzten familiek ere baimenak eta laguntzak izango dituzte.