Epaileak espetxean sartu du Maialen Mazonen ustezko hiltzailea

Maialen Mazonen ustezko hiltzailea kartzelan sartu zuen atzo epaileak, astelehenean Guardia Zibilak Zaragozan (Espainia) atxilotu ostean. Josu Erkoreka Eusko Jaurlaritzako Segurtasun sailburuak adierazi zuen Ertzaintzak urtarriletik zekiela gizonak urruntze agindua urratzen zuela, eta gehitu zuen ez dela «erraza» bere burua «arriskuan ikusten ez duen biktima bat» babestea. Feministen haserrea piztu dute adierazpen horiek, baina Iñigo Urkullu lehendakariak Segurtasun sailburuaren hitzak babestu zituen atzo, eta haren hitzei «sinesgarritasuna» emateko eskatu zuen. Espainiako Berdintasun Ministerioak ere baieztatu du hilketa krimen matxista bat izan zela.

Gasteiz etorbideko apartamentu hotel bateko logela batean aurkitu zuten Mazonen gorpua igandean. Bikiez haurdun zegoen, eta gorpuaren ondoan onik aurkitu zuten haren hiru urteko alaba ere. Ikerketa abiatu zuten berehala, gorpuak indarkeria zantzuak baitzituen. Arratsaldearen erditsurako baieztatu zuten kasua hilketa matxista bat zela. Andreak 32 urte zituen, eta Gasteizkoa zen. Urteko bigarren hilketa matxista da. Aste biren bueltan gertatu dira biak. Azkena larunbatean gertatu zen. Andrearen bikotekidea desagertuta zegoen ordutik, eta Guardia Zibilak atzeman zuen Zaragozan, astelehenean, taxian zihoala. Astelehen gauean ekarri zuen Poliziak hango polizia etxetik Gasteizera, eta atzo goizean deklaratu zuen Gasteizko Guardiako Epaitegian.

Astelehenean, hilketa salatzeko elkarretaratzeetara deitu zuten Euskal Herriko hainbat txokotan, eta, atzo ere, Euskal Herriko Emakumeen Mundu MartxakBilbon, Donostian eta Iruñean deitu zuen protestara, baita Sakanako Itaiak Altsasun ere. Elkarretaratzeetan, era berean, Erkorekak indarkeria matxistako kasuari egindako jarraipenaren inguruan esandakoak gaitzetsi, eta indarkeria matxistaren inguruko protokoloak berrikusteko eskatu zuten.

Izan ere, kazetariek sailburuari galdetu zioten zergatik ez zuten erasotzailea atxilotu, jakinda urtarriletik urruntze agindua urratzen ari zela. «Ez dakit», erantzun zien sailburuak. Halako egoeretan biktima babestea nekeza dela erantsi zuen: «Ez da erraza bere burua arriskuan ikusten ez duen biktima bat babestea. Harreman afektiboez ari gara, eta, halakoetan, biktimak beti ez du argi ikusten babesa behar duela».

Atzo, Urkullu lehendakariak babesa eman zion sailburuak esandakoari, eta adierazi zuen«sinesgarritasun osoa» ematen diela Erkorekaren hitzei. Gehitu zuen kasua ez duela Ertzaintzak bakarrik kudeatu, eta elkarlanean aritu dela «estatuko beste indar polizial batzuekin» eta Mazoren familiarekin.

Familiak, bestalde, «hiltzaileaz gain beste errudunik ez bilatzeko» eskatu zuen atzo, komunikatu baten bidez. Helarazitako babesa eskertu zien herritarrei eta instituzioei, baina «errespetua» eskatu zien hedabideei, eta hilketaren kasuari trataera egokia ematea galdegin zuen.