Albistea entzun

Erretxin mediatikoa eta lider hieratikoa

Sare sozialetako kritikoekin liskartu berri da, beste behin, Kevin Durant. Silababakarrekin gidatu ohi ditu kideak Kawhi Leonardek. Bien taldeek, Golden State eta Toronto, NBAko finalari ekingo diote bihar goizaldean.
Toronto Raptorseko Kawhi Leonard, Milwaukee Bucksen aurka.
Toronto Raptorseko Kawhi Leonard, Milwaukee Bucksen aurka. WARREN TODA / EFE Tamaina handiagoan ikusi

Danel Agirre -

2019ko maiatzak 30

NBAko finalaren bi lehiakideetako batek ez daki noiz ahal izango duen kantxaratu azken bi sasoietako txanpa erabakigarriko jokalari baliotsuena. Ez da erraza jakiten Kevin Durant itzul dadin irrika handiagoa nork duen: bere taldeak, Golden State Warriorsek, edo hegalekoaren beldur behar lukeen Toronto Raptorsek.

Houston Rocketsen aurkako kanporaketako bosgarren lehian Durantek min hartu zuenetik, ibilera alderrai samarra zuzendu eta bost bider segidan irabazi du Warriorsek. Mozketetan eta baloi zirkulazioan oinarritutako duela hiruzpalau urteko jokoa berreskuratu du bidean. Eta horixe da kezkagarriena Raptorsentzat: ustez, lanabes hobeak ditu Durant partaide duen erasoa trabatzen saiatzeko —banakako saiakeren pisu handiagoarekin—. Milwaukee Bucks indarrik gabe utzita dator Toronto. Esparruan zentimetro eta kilo askorekin kolapsoa eragin, eta Giannis Antetokounmpori bidea guztiak itxita lortu zuen. Hiruko saiakera eroso samarrak baimendu behar izan zituen ordainetan, baina Buckseko espezialisten batezbestekoak ez ziren onak izan, presioagatik. Stephen Curry eta Klay Thompson borrero dituzten Warriors klasikoentzat beste zerbait pentsatu beharko du Nick Nurse kanadarraren entrenatzaileak.

Duela hiru uda iritsi zenetik, Durant gabe 25 lehia irabazi eta lau baino ez ditu galdu Golden Statek. Konferentzia finalean taldeak azaldu maila apartekoa dela medio, haren faltan hobeto konpontzen ote ez diren espekulatzeari ekin diote hainbat analistak. Durant zeharo erretxindu du iradokizunak, bere sare sozialetako purrustada bitxiek frogatzen duten lez. Kazetarien eta zaleen solasaldi txepelenetan nahastu da, eta esku hartzeekin errespetu bila zebilenak iseka baino ez du jaso ordainetan.

Ez da Duranten gisa horretako lehenengo irristada. Warriorsera egin zuenean izan zen kritika oldeari aurre egiten saiatzeko, Twitterren eta Instagramen erabiltzaile faltsuak ere sortu zituen, The Washington Post egunkariak argitara eman zuenez. Eraztunak pilatu eta historiako jokalaririk geldiezinenetakoa dela inork ukatu gabe, bere ondarearen benetako itzalari buruzko eztabaidak ohikoak dira sare sozialetan. Ziurtzat jotzen da udan Golden State utziko duela.

Badaki Warriorsi min egiten

Litekeena da bihar goizaldean (03:00) etxean ariko den Torontoren izar Kawhi Leonardek ere kontraturik ez berritzea. Urte bakarrerako iritsi zen San Antoniorekin trukean, eta haren egoera fisikoari buruzko ziurgabetasuna erabatekoa zen. Frankiziarekin erabat konprometitu gabe ere, modu eredugarrian gidatu du Raptors lehenbiziko aldiz finalera. Zaintzan agortu ditu indarrak, saskiaren bila bezainbeste. Eta Spursekin txapeldun izan zenean bezala, presioa areagotu ahala bere ekarpena eskuzabalagoa suertatu da. Taldekideek fede itsua dute harengan: «Hemen izandakoa da; eroso sentitzen da egoera hauetan. Zenbat eta foku gehiago izan, orduan eta hobeto jokatzen du», aitortu du Danny Green eskoltak.

Hutsarteetan silababakarrekin komunikatzen den liderra da Leonard. Sare sozialik eta irririk gabeko antiheroia. Hori gutxi ez, eta Warriors hauek ernegatzen asmatu izan duen bakarrenetakoa da.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Nerea Nevado baloiarekin, atzo, Levanteren aurka. ©Athletic

Denboraldiko lehen porrota Athleticentzat

Berria

Levantek kontrolatu du neurketa, eta Redondoren eta Mayra Rodriguezen golei esker lortu ditu hiru puntuak. 

Nerea Arruti, garaipena ospatzen. ©Idoia Zabaleta / FOKU

Nerea Arrutik eta Andoni Iruretagoienak irabazi dute Euskal Pentatloia

Edu Lartzanguren

Iruretagoiena bigarren urtez nagusitu da. Iazko irabazle Karmele Gisasola bigarren geratu da.

 ©UNAI ZABALETA

«Eibarrekin Lehen Mailara igotzea baino ez daukat buruan»

Iñaki Berastegi

Etxean bikain abiatu du sasoia Eibarrek, baina etxetik kanpo, nahi eta ezin. Arbillaren ustez, partida guztiak irabazteko «gosea» izan behar du taldeak igoeragatik borrokatzeko.
Evenepoel, bakarrik helmugaratzen. ©DEAN LEWINS / EFE

Evenepoelek irabazi du Munduko Txapelketa, modu ikusgarrian

Berria

25 kilometroz bera bakarrik aritu da ihes eginda. 2018an ere irabazi zuen lasterketa.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...