Gaur erabakiko du UDCk galdeketan zer erantzun

Galdeketa babestu duten alderdi gehienek argitu dute jada zer bozkatuko luketen galdera bikoitzean: CDCk, ERCk eta CUPek bietan baietz; ICVk lehenengoan baietz (Katalunia estatua izatea), baina bigarrena kideen esku utziko du. Zalantza handiena Unio-k eragin du orain arte; CDCren koaliziokide izanagatik, independentistak ez diren kide batzuk baitauzka, tartean Josep Antoni Duran i Lleida alderdiko burua bera. Gaurko batzarrean erabakiko dute ICVren antzeko irtenbide bati heldu edo ez.