Albistea entzun

ZUZENDARIEN GALEUSCA

Pintza

Vicent Partal - 'Vilaweb'-eko zuzendaria

2021eko azaroak 14

Ikusi duzue, Maria eta Martxelo: PSOE eta Podemoseko diputatuek «sudurrean pintza jarrita» eman diete botoa PPk Auzitegi Konstituzionaleko kide izateko proposatu dituen hautagaiei. Batzuek beren aldetik jo dute, segur aski latza zelako kiratsa eta ezin zutelako eraman, baina gehienek, meneko, bi pertsonaia ezin doilorragoren alde bozkatu dute. Espainiako diputatuek eta hedabideek nabarmendu dute Espainiako ezkerra deseroso sentitu dela Enrique Arnaldoren izendapenarekin; katalanentzat, ordea, Concepcion Espejel okerragoa da kasik.

Arnaldo pertsonaia iluna da, bai, arrunt iluna, eta zenbait ustelkeria kasutan nahasita dago, Palma Arena kasuan bereziki. Frogatuta geratu da, gainera, garai batean lasai ederrean urratu zuela botoa eman dion gorte horren beraren estatutua, zenbait batzordetan aholkulari juridiko gisa lanean aritu zen aldi berean aritu baitzen aholkularitza enpresa pribatu batean ere, noren-eta Jaume Matas presidentearen aholkulari. Hori dena aintzat hartuta, ez dirudi eredugarria denik Espainiako auzitegi nagusiko kide bati dagokion eran. Orain, ordea, zurigarri gisa esan ahalko du ez zela, bada, hainbesterako izango, PSOEk eta Podemosek botoa eman diotenez gero. Amatxo maitea!

Concepcion Espejel, berriz, PPren eskumakila izan da Espainiako Auzitegi Nazionalean, eta, beti, erabaki politikoez baliatuz egin du aurrera bere ibilbide judizialean. Guadalajarako Auzitegira, adibidez, Aznarren zuzen-zuzeneko gomendioz iritsi zen. PPk Botere Judizialaren Kontseilu Nagusiko kide ere bihurtu zuen, alderdi horri eragiten zioten ustelkeria kasuak kontrola zitzan. Handik, Auzitegi Nazionalera jauzi egin zuen, eta epaile aritu zen Altsasuko gazteen eta Pablo Haselen kasu sonatuetan, besteak beste. Espejel izan zen, halaber, Mossos d'Esquadrako buru Josep Lluis Trapero epaitu zuen auzitegiko presidentea, eta 461 orrialdeko boto partikular erridikulu bat idatzi zuen hura sedizioagatik kondenatzearen alde, nahiz eta sententzia, 96 orrialdekoa, hura absolbitzearen aldekoa izan.

Gure hiru herrialdeetako indar nazionalista eta independentista guztiak, BNGtik hasi eta Compromiseraino, kontra azaldu zaizkie hala izendapen horiei nola PPk inposatutakoa irensteko PSOEk eta Podemosek erakutsi duten otzankeriari. Baina kontua da erregimenaren laguntxoek baiezko botoa eman dutela. Eta, sudurrean pintza jarri badute ere, hortxe ditugu orain bi pajaro horiek, Konstituzionalean eserita. Ikasbide erabatekoa.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.