Albistea entzun

ENBAXADA BILA

Hauteskundeak

Vicent Partal - VilaWebeko zuzendaria

2020ko ekainak 28

Gure bi herrialdeen iparraldean gaur egingo diren udal bozek eta Euskal Autonomia Erkidegoan hauteskunde kanpaina hasi izanak normaltasun politikoko kutsu bat ematen diote bolada honi, pandemia batetik gatozela kontuan hartuz bereziki bitxia den bolada honi.

Jakin-min handia dut zer gertatuko den. Batetik, abstentzioarekin; edo parte hartzearekin, zeina ez baita gauza bera baina gauza berbera baita. Jendeak atzera egingo ote du koronabirusaren mehatxua dela eta? Eta, hala bada eta hori bozketan nabaritzen bada, zeini egingo ote dio mesede? Alderdiei leialen zaizkienak soilik joango ote dira botoa ematera? Herritarren sektore batzuek, edadetuen kolektiboak adibidez, erreparo gehiago izango ote dute parte hartzeko? Eta horrek aldaketaren bat ekar ote dezake gero lau urte iraungo duena?

Hauteskunde bitxiak izango dira biak: udal bozak, osasun krisiaren latzenean bertan behera utzi behar izan ziren hauteskunde batzuen bigarren bozaldia direlako; eta EAEkoak, parlamentua desegina zegoelako eta ondorioz egoera ez zelako batere normala. Lehendakariak, ordea, maniobra egin zuen bozak orain egin ahal izateko, azkar, eta iruditzen zait hauteskunde kalkuluak ere badaudela hor tartean hein batean. Krisi ekonomikoa mahai gainean dago, baina anormaltasunak eta pandemiari zaion beldurrak pisu handiegia dute oraindik. Adi egon behar ikusteko zer gertatzen den uda osteko hauteskundeetan, ordurako krisi ekonomikoa izugarria izango baita eta, espero dezagun, osasun krisia baretuxeago egongo baita. Gerta daiteke gobernuak gogor zigortuak izatea giro horretan, gauzak inondik ere ezin aurreikusteko moduan jarriko baititu egoerak, nik uste.

Europan ez dago hauteskunde askorik antolatuta udazkenerako. Baina, itxura guztien arabera, Katalunian egingo dira, jokaleku posible guztietatik okerrenean egin ere, eta ez soilik pandemiaren ondorioz.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.