Albistea entzun

HIZPIDEAK

Eutanasia lasaia

Martxelo Otamendi Egiguren -

2021eko abenduak 14

Gure bizitzako une askotan bezala, «eta hau ezin al genuen lehenago egin? zergatik ez genuen lehenago egin?» galdetzen diogu geure buruari gauzatu ezinezkoak ziruditen erabakiak hartu eta handik urte gutxitara. Hamarkadetan onartu gabe egon eta halako batean onartutako eskubide askorekin jazo ohi zaigu. Eutanasia da horietako bat, duela urte batzuk tabu zen gaia normaltasun guztiarekin onartu dugu gaur egun.

Eutanasiaren datuak jakinarazi zituen atzo Eusko Jaurlaritzak, legea Espainian ekainean indarrean jarri zenetik: 34 eskaeretatik, 13ri aplikatu zaie hiltzeko protokoloa, zortzi zain zeudela hil ziren, 12 azterketa fasean daude eta bati ukatu egin diote eutanasia egiteko aukera. Zenbaki bakoitzaren atzean pertsona bat dagoela ahaztu gabe, normaltasun guztiarekin hartu dira datuok, zarata handirik gabe; hiltzeko erabakia hartu duten pertsona horiek heldutasun guztiarekin hartu dutelako, haien erabakiarekin errespetuzkoa den protokoloa eskura jarrita. Zergatik ez lehenago?

Jaurlaritzaren informazio berean jakin dugu zabaldutako kontzientzia eragozleen erregistroan fakultatiboen %1,9k eman dutela izena. Zergatik onartzen zaie eragozle izatea osasun publikoan lan egin nahi duten fakultatiboei? Abortua, eutanasia... zein izango da hurrengoa?

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...