Albistea entzun

ELE

Informazioa

Iban Zaldua -

2021eko abuztuak 15

Espainiako gobernuaren kabinete-krisiaren ondoren, laburki, eztabaida sortu zen: eraman al ditzake ezkerreko ministro batek bere seme-alabak eskola pribatu batera? Edo, hobeto esanda, zilegi al da gobernu progresista bateko hautagaiengan pentsatzean faktore hori aintzat ez hartzea: zein saretan dauzkaten seme-alabak? Kontua da Pilar Alegria hezkuntza ministro berriak bereak Zaragozako Lizeo Frantsesean dituela matrikulatuta, eta horrek zalantzak sortu zituen (zenbait gaizki-pentsaturengan: tartean nigan) hezkuntza publikoaren gidari nagusi gisa izango duen jarreraz.

Halako eztabaida bat EAEra mentalki ekartzeko aukera baztertu nuen hasieran: azken batean, gure gobernua ez da ezkerrekotzat aldarrikatzen, eta, ondorioz, normala litzateke, kasik derrigorrezkoa (filosofikoki) hezkuntza sailburu batek (edo lehendakari batek) bere ondorengoak pribatura eramatea. Ez dakit hala den; edonola, jatorri profesionalari dagokionez, gure hezkuntza saileko kupularen zati handi bat, esanguratsuki, hezkuntza pribatuarekin dago lotuta.

Baina gero pentsatu nuen baietz, informazio hori ere eman beharko liguketela politikariek, hauteskunde garaian. Edo kazetariek atera beharko lieketela, elkarrizketetan. Ea umeak zein saretan dauzkaten eskolatuta. Auzoko anbulatoriora joaten diren, ala aseguru mediku pribatua duten kontratatua. Pentsio-planak dauzkaten, ala ez. Garraio publikoaren erabiltzaile ohikoak diren. Etab. Labainkorra da, ados. Baina bizitza pribatua publiko bihurtu dugun Instagram aroan ez dut uste hainbeste eskatzea denik.

Niri, susmoa dut, lagungarria gertatuko litzaidake, botoa ematean. Eta, batik bat, agintarien erabaki batzuk ulertzeko orduan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.