Katalunia. Mobilizazioak

Tsunami Demokratikoak dei egin du protesta «ez-biolentoei» eustera

Plataformak ez du baztertu beste ekintza handi bat antolatzea hilaren 26a baino lehen
Manifestari talde bat, atzo, Bartzelonako Ronda Litoral kalea moztu zutenean.
Manifestari talde bat, atzo, Bartzelonako Ronda Litoral kalea moztu zutenean. QUIQUE GARCIA / EFE

Ander Perez Zala -

2019ko urriak 17
Tsunami Demokratikoa plataformak atzo herritarrei dei egin zien sententziaren aurkako mobilizazioen izaera baketsuari eustera, «diziplina ez-biolentoa» errespetatze aldera: «[Espainiako] Estatuak eta segurtasun indarrak lanean ari dira indarkeria eragiteko eta sustatzeko».

Sare sozialetan publikaturiko komunikatuan, plataformak adierazi zuen egunotako «Poliziaren indarkeria guztiz onartezina» dela, eta exijitu zuen «ardura politikoak hartu behar» direla. «Mugimenduaren oinarrizko estrategia indarkeriarik eza da, sineste osoarengatik eta eraginkortasunarengatik».

Tsunami Demokratikoarentzat, aste honetan abiaturiko «etapa berriak ez du atzerako martxarik», eta ez da amaituko «Estatuak onartzen duen arte Kataluniako herritarrek mahai gainean jarritako arazo politikoari elkarrizketaren eta ariketa demokratikoaren bidea erabiliz egin behar diola aurre».

Plataforma izan zen sententziari erantzuteko Bartzelonako Prat aireportuan mobilizatzeko deia egin zuen taldeetako bat. Egun hartan, milaka lagun joan ziren aireportura, eta mossoak eta Espainiako poliziak oldartu egin ziren. 131 pertsona zauritu zituzten: horietako bat begi bat gabe utzi dute, gomazko pilota batekin tiro egin ziotelako —Katalunian debekatuta daude horrelakoak—, eta beste batek barrabil bat galdu du.

Herenegungo mobilizazioetan, poliziek, 125 lagun zauritu, eta 31 atxilotu zituzten Bartzelonan, Gironan, Tarragonan eta Lleidan. Kataluniako hiriburuan egindakoak hartu zuen oihartzun handiena, Espainiako Gobernuaren ordezkaritzaren parean egindakoak, mossoak manifestarien aurka oldartu zirenean; Errepublikaren defentsarako batzordeek (CDR) egin zuten protestarako deia, eta oldarraldien ostean 250 su piztu zituzten, Generalitatearen arabera. Denera, 200 zauritu izan ziren, manifestariak eta poliziak aintzat hartuta.

Hori ikusirik, Espainiako Gobernuak herenegun gauean adierazi zuen indarkeria «erabat zabaldu» dela Katalunian, eta Fernando Grande-Marlaska jarduneko Barne ministroak egun berean jakinarazi zuen plataforma ikertzen hasi zirela.

Tsunami Demokratikoak atzoko komunikatuan erantzun zuen biolentziarik eza dela herritarrek duten «tresnarik indartsuena» epaiari erantzuna emateko: «Lehentasunetako bat da indarkeria sustatu dezaketen edozein ekintza eragoztea».

Datozen mobilizazioak

Berez, Tsunami Demokratikoak hilaren 26rako zuen antolatua hurrengo mobilizazio handia —oraindik ez du zehaztu nolakoa izango den—, eta horixe bera jakinarazi zuen atzo eguerdian kaleraturiko oharrean.

Arratsalde aldera, ordea, egun horri erreferentzia egiten zion esaldirik gabeko komunikatu bat kaleratu zuen: «Laster egongo dira Tsunamiaren mobilizazioak. Hurrengoa jakinaraziko dugu aplikazioan milaka tanta garenean».

Plataformak sakelakoetarako aplikazio bat sortu zuen, eta horren bidez ematen du antolatzen dituen ekintzen eta protesten berri.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna