Sexu erasoak egotzitako tatuatzailearentzat 21 urteko zigorra eskatu dute

Hamabi andrazkok gizonaren aurka jarritako salaketak jo dituzte ontzat, hasieran hamabost baziren ere. Preso dago akusatua iazko otsailetik
Sexu erasoen aurkako protesta bat, artxiboko irudi batean.
Sexu erasoen aurkako protesta bat, artxiboko irudi batean. IDOIA ZABALETA / FOKU

Olatz Esteban Ezkati -

2019ko uztailak 31
Donostiako Parte Zaharrean zuen estudioa sexu erasoak leporatuta auzipetuta dagoen tatuatzaileak. Hamabi andrek jarritako salaketen harira, epaileak hamalau delitu egotzi dizkio orain: zazpi, sexu gehiegikeriagatik; hiru, erasoagatik; hiru, jazarpenagatik; eta beste bat, apalarazteagatik. Gipuzkoako Fiskaltzak 21 urte eta lau hilabeteko kartzela eskaera egin du harentzat. Epaiketa irailean egingo dute, Donostiako Zigor Auzitegian.

Erasoak 2013ko otsaila eta 2018ko urtarrila bitartean jazo ziren. Hain zuzen ere, urtarrilean atera zen argitara lehen kasua: emakume batek Facebooken bitartez eman zuen jasandakoaren berri. Mezuan azaldu zuen dendara sartu orduko hitz «probokatzaileak» entzun behar izan zituela, eta, tatuajea besoan egin behar bazuen ere, ipurditik eta aldakatik «sendo» heldu ziola tatuatzaileak.

Lehen testigantzaren harira, «ofizioz» hasi zuten kasuaren gaineko ikerketa. Donostiako Udaltzaingoak informazioa eskuratu zuen herritarren laguntzari esker, eta salaketa berriak bildu ostean, iazko otsailaren 5ean atxilotu zuten gizona, epailearen aginduz. Ordutik, kartzelan dago, behin-behinean.

Hasieran, hamabost emakumeren salaketak bildu zituen fiskaltzak, baina ikerketa fasea amaitzean, atzera bota ziren hiru kasu. «Gertakariak haientzat oso deserosoak» izan zirela adierazi bazuen ere, kasu horietan deliturik ez zegoela ebatzi zuen justiziak.

Fiskaltzaren txostenaren arabera, eraso gehienak tatuatzailearen estudioan jazo ziren, baina baita haren etxebizitzan eta tatuatzaileen eskola batean ere, han irakasle baitzen. Besteak beste, irain lizunak, ukituak eta gogoz kontrako musuak izan zirela biltzen du txostenak. Cristina Morcillo akusatuaren abokatuak, ordea, esan du gertaerak ez direla «benetakoak», eta gizonaren absoluzioa eskatu du. Abokatuak salatu du prozesua ez dela «berme guztiekin» egin, eta «oinarrizko eginbideak» falta izan direla; hain justu, mezu bidezko «elkarrizketa garrantzitsu batzuk alde batera utzi» direla argudiatu du. Haren hitzetan, mezu horiek «akusatuaren eta biktimen arteko harremanaren ikuspegi argiago bat» eskainiko lukete.

Erasoei erantzuna

Donostiako herritarrek eta mugimendu feministak erantzun irmoa izan zuten erasoen aurrean, eta elkartasuna eta babesa adierazi zieten erasoak pairatu zituzten andrazkoei. Erasoen albistea zabaldu ostean, hainbat pintaketa agertu ziren tatuatzailearen aurka haren estudioan.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna