BI AHOTSETARA

Sugea

Antton Iturbe -

2017ko urtarrilak 22
Anoetako kiroldegia. Donostia. 1991ko otsailaren 17a. Iggy Pop agertokian, prakak belaunetaraino jaitsiak, eta neu ikusleen artean, aho bete hortz. Kontzertu haren bi ordu eskasek mugarri baten erara arrakala sakon bat ireki zuten nire bizitzan. Rock musikaren benetako arriskua, zirrara eta pozoia dastatzen ari nintzela sentitu bainuen, eta, Obelix edabe magikoko eltzera erori zenean bezala, haren indar amaigabea betirako nirekin izango zela pentsatu nuen une hartan. Egia esan, egungo rock musika gehienak Teleberri batek baino zirrara gutxiago eragiten dit, baina, tira, epifania hura ez dut inoiz ahaztuko, eta Iggy heroia izango da beti niretzat. Horrexegatik, poz handiz irakurri dut nire zuzendari kuttunena den Jim Jarmuschek Iggyren jatorrizko taldea zen The Stoogesen inguruko dokumental bat egin berri duela eta, bide batez, bi orduz gau hartako lurrikara pertsonala berriz bizitzera gonbidatzen nauela.

Garai berean, Mogambo eta Sarobe aretoetan birritan ikusi nuen Cancer Moon taldea, eta Josetxo Anitua eta Jon Zamarriparen presentzia eszeniko izugarri (zentzu guztietan) hark iman baten moduan erakarri eta buru-belarri irentsi ninduen. Eibartar eta bilbotar haien rock aske, bortitz, dotore eta hipnotikoa munduko beste edozeinen parekoa iruditzen zitzaidan, eta, bertakoak izanik, identifikazio sentsazioa erabatekoa zen niretzat.

Baina urte hauetan guztietan oroitzapen haiek elikatu dute batik bat nire obsesioa, ordudanik nekez aurki baitzitekeen taldearen inguruko irudi berririk. Horrexegatik, oraindik eta poz handiagoa izan dut jakin dudanean Alvaro Fierro eta Ibon Ibarluzea taldearen inguruan Atrapados por la serpiente dokumentala prestatzen (eta finantza bila) dabiltzala. Cancer Moonen musikaren lilura misteriotsua hilezkorra da, eta hamaika irakurketa zahar eta berri onartzen ditu. Irrika handiz espero dut filma, beraz, eta nire zutabetxo honetatik zorterik onena opatu eta nire elkartasuna adierazi nahi nieke bere egileei.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna