Albistea entzun

«Estatuaren estoldak» ikertzeko batzorde bat eskatu dute Kongresuan

EH Bilduk, UPk, ERCk, Juntsek, PDeCATek eta CUPek, Compromisek eta BNGk eskatu dute. EAJk eta Mas Paisek, ordea, ez dute babestu
Mertxe Aizpurua, Felix Bolaños ministroaren hitzaldian.
Mertxe Aizpurua, Felix Bolaños ministroaren hitzaldian. MARISCAL / EFE Tamaina handiagoan ikusi

Javi West Larrañaga -

2022ko maiatzak 13

«Estatuaren estolden» funtzionamendua ikusteko ikerketa batzorde bat galdegin zuten atzo EH Bilduk, Unidas Podemosek, ERCk, Juntsek, PDeCATek, CUPek, Compromisek eta BNGk, Espainiako Kongresuan. Batzorde horrek hainbat kontu ikertzea nahi dute: Jose Manuel Villarejo Espainiako Poliziako komisario ohiaren operazioak eta espioitzarako Pegasus programaren erabilera, besteak beste.

Batzordearen helburua izango da «estoldak» aztertzea, alegia «estatuaren estamentu ofizialen eta egitura mediatiko, enpresarial eta parapolizial baten arteko lotura» zein den ikustea. Izan ere, uste dute «estatu erakundeen baliabide eta arma bereiziak interes orokorrekoak ez diren interes faltsuen zerbitzura ipini direla, ustez, diru bereiziekin».

Apirilaren amaieran eskatu zuten lehenengo aldiz alderdi horiek Pegasus sistemaren auziari buruzko ikerketa batzorde bat, kasuak eztanda egin zuenean, baina Kongresuko Bozeramaileen Batzarrak bertan behera utzi zuen, PSOE, PP eta Vox-en ezetzagatik. Batzorde haren aldeko eskaera sinatu zuten EAJk eta Mas Paisek sasoi hartan, baina ez dute oraingoa babestu. Lehenago ere ikertu izan dituzte «estatuaren estoldak» Espainian. 2017an, Mariano Rajoy presidentearen legegintzaldian, hain justu, polizia indarren goi karguei buruzko batzorde bat eratu zuten, eta oraingo legegintzaldian Kitchen operazioa deituari buruzkoa.

EAJren arabera, Espainiako Gobernuak Pegasusi buruz egiten dituen hurrengo pausoak «erabakigarriak» izango dira inbestidurako bazkideen konfiantza berreskuratzeko. Aitor Esteban Kongresuko bozeramaileak kasua «argitu» dadila eskatu zuen atzo ETBn, eta «gutxienez», dokumentuak desklasifikatzeko. Diputatuak adierazi zuen «gakoa» Kataluniako alderdiak izango direla, batez ere ERC, eta «ikusi beharko dela» Gobernuaren mugimenduek alderdi horren nahiak asetzen dituen.

Azaldu zuenez, kasuak ez ditu jeltzaleak harritu: «Bizitza osoan espiatu dute, eta jarraituko dute. Kontrolak hobetzen saiatu behar da». Gainera, esan zuen CNIko Paz Estebanen kargu uztea «etxea teilatutik hastea» modukoa dela, eta oraindik gardentasuna behar dela; ikertu behar da norenak diren ardurak eta ondoren hasi behar da kargugabetzeekin. «Ez dugu nahi hau ke laino bat bihurtzea». Estebanek esan zuenez, Espainiako Gobernuak «kontua atzean uztea» nahi du, «denbora aurrera joan ahala baretzeko». Horrez gain, salatu zuen astero blokeatzen ari direla EAJk aurkeztutako Lege Ofizialen Legearen aldaketa. Kataluniako Parlamentuak, bestalde, Defentsa ministro Margarita Robles ministroa kargugabetzeko eskatu du, espioitza kasuen harira.

Momentu «erabakigarria»

Inbestidurako bazkideen aliantzaren tentsioa Segurtasun Nazionalaren Legearen erreforman ere nabaritu da. Atzo goizean aurkeztu zuen gobernuak Gorteetan, eta ERCk eta Juntsek osoko zuzenketak aurkeztu zituzten. Presidentetza ministro Bolañosek adierazi zuen 2015eko legearen aldaketa «puntual» bat zela, eta estatuari krisi sasoietan baliabide estrategiko egokiak ematea dela helburua. Baina ERCk eta Juntsek gobernuari aurpegiratu zioten ekinbideak autonomia erkidegoen eskumenak urratzen dituela, eta horregatik egin zizkioten osoko zuzenketak. «Ezkutuko 155 bat da, eskumenak musu truk kentzeko», salatu zuen ERCko Montserrat Bassak. CUPek, EAJk eta EH Bilduk ere kritikatu zuten, «zentralizatzailea» izateagatik.

PPk salbatu zuen gobernua, zuzenketen aurka bozkatu baitzuen. Cuca Gamarra bozeramailearen berbetan, Pegasusen inguruko berrien harira, «inoiz baino beharrezkoagoa da segurtasun nazionala». Antzera mintzatu zen Robles ministroa, eta CNIko zuzendaritza aldatu arren, «jarraitutasuna» aldarrikatu zuen, erakundearen zuzendari berriaren kargu hartze ekitaldian. «Jarraitutasun hutsa da, ez da ezer aldatuko, baina asko aldatuko da», adierazi zuen. Gainera, gehitu zuen «era sofistikatu batean, hackeoen bidez Espainia erasotzen dutenek» CNI, inteligentzia militarra eta justizia aurrez aurre izango dituztela.

Fernando Grande-Marlaska Barne ministroaren arabera, «mesfidantza» sor dezake gobernuko kideen sakelakoak nork zelatatu dituen espekulatzen ibiltzeak. Pedro Sanchez eta Margarita Roblesen telefonoak espiatu zituzten Pegasusekin, eta oraintsu jakin da Marlaskarenean ere sartu zirela.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

AEBek «atzerriko talde terroristen» zerrendatik ezabatuko dute ETA

AEBek «atzerriko talde terroristen» zerrendatik ezabatuko dute ETA

Uxue Rey Gorraiz

Etxe Zuriak guztira bost talde aterako ditu aurki zerrendatik, Japoniako Aum Shinrikyo eta bi talde islamista tartean. Orain arte soilik hamabost talde ezabatu dira multzo horretatik.

Joseba Azkarraga eta Bego Atxa Sareko bozeramaileak, gaur, Gasteizen. ©Raul Bogajo / FOKU

Inkomunikazioan oinarritutako zigor guztiak baliogabetzeko eskatu du Sarek

Maddi Ane Txoperena Iribarren

Gainontzeko presoei ere Atristain doktrina aplikatzea galdegin du euskal presoen eskubideen aldeko mugimenduak: «Asko dira Xabier Atristainen egoera berean Auzitegi Nazionalak epaitu eta zigortu dituen euskal presoak».

Aitor Esteban, atxiboko irudi batean. ©JUAN CARLOS HIDALGO / EFE

Ikus-entzunezkoen Legeari 45 zuzenketa txertatzea adostu dute EAJk eta Espainiako Gobernuak

Iosu Alberdi

Agirretxeak jakinarazi du estatuak EITBn «eskua sartzea» eragotzi dutela.

Bozkaleku bat 2019ko maiatzaren 26ko hauteskundeetan, Donostian. ©GORKA RUBIO / FOKU

BOTO PAPERAK, HITZAURREAN

Jon O. Urain

Udaletako, foru aldundietako eta Nafarroako Parlamentuko agintaldiak azken hilabeteetan sartuak dira, urtebete falta baita hauteskundeetarako. Oro har, alderdiak udazkenean sartuko dira bozen dinamikan, baina horien bilakaerak eta portaerak arrasto batzuk ematen dituzte bozketan jokoan egongo denaz.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...