Adegiren aukera

Gaur hartuko du Eduardo Zubiaurrek, Adegiko buru ohiak, Confebaskeko presidentetza, Pedro Larrañagak lau urteko agintaldia bete eta gero. Gipuzkoako patronalari zegokion aukeratzea Confebaskerako buruzagitza —Bizkaiko Cebek eta Arabako SEA enpresaburuen elkarteekin batera osatzen dute Confebask—, eta Adegik etxeko gizona hautatu du. Zubiaurre Adegiko presidente izan zen 2006. eta 2012. urteen artean.

Confebasken leman, eibartar batek beteko du beste eibartar batek utzitako lekua. Izan ere, Gipuzkoako hiri berean jaioak dira Larrañaga eta Zubiaurre, nahiz eta Larrañagak ibilbide profesionala Araban egin duen. Hain zuzen ere, SEAk proposatuta izendatu zuten Confebaskeko buru.

Zubiaurre (Eibar, 1962), berriz, Jaz Zubiaurre SA enpresako arduradun nagusia da; Domingo Zubiaurrek abiarazi zuen, 1924an, eta Eduardo Zubiaurrek haren gidaritza hartu zuen orain hamarkada batzuk. Adegin hainbat kargu berritzeko ekinaldia izan zuen, eta Jose Maria Ruiz Urtxegi idazkari nagusia kargugabetu zuen 2008an, 25 urtez karguan egon eta gero. Zubiaurrek krisi ekonomikoaren lehen zartadak bizi izan zituen Adegiko presidentea zela, eta ETAk orduantxe hil zuen Inazio Uria enpresari azpeitiarra.