Noiz sortua: 2020-05-23 00:30:00

Koronabirusa

Konfinamendua, hazteko bidea

Aldundien babespean dauden umeek hezitzaileekin edo harrera familiekin igaro dituzte martxoaren 14tik aurrerako egunak. Telefonora edo bideo deietara mugatu dira jatorrizko familiarekin izandako hartu-emanak. Ikasgaiak badira.
Haur bat etxean jolasten, konfinamendu garaian.
Haur bat etxean jolasten, konfinamendu garaian. IÑIGO URIZ / FOKU Tamaina handiagoan ikusi

June Prieto -

2020ko maiatzak 23

Konfinamenduak areagotu egin ditu gizarteko desberdintasunak, eta egoera kalteberan dauden nerabe eta umeei ere eragin die etxetik atera barik egon behar izateak. Aldundien babespean dauden umeak hezitzaileen edo harrera familien esku egon dira egun hauetan, eta bideo deiez edo telefonoz soilik aritu ahal izan dira jatorrizko familiako kideekin. Taldea egonkortzeko eta hazteko ere balio izan diela adierazi dute haiekin konfinamenduan egon diren zenbaitek.

Bizkaian 900 ume baino gehiago daude foru aldundiaren babespean. Eskolek edo udaletxeek antzematen dituzte kasu berezi horiek, eta, gero, aldundiak erabakitzen du umeari zer zerbitzu komeni zaion. Lander Gormedino hezitzailea da, eta Bilboko harrera etxe batean egiten du lan, aldundiarekin hitzarmena duen erakunde batean. «Lehenengo aukera beti da harrera familia batekin bidaltzea, baina beti ez da posible izaten, eta horretarako gaude gu».

Gormedinoren etxean hamar gazte daude, zortzi eta hamazazpi urte artekoak, bakoitza bere kasu partikularrarekin. «Ohikoena da familiarekin harremana mantentzea; helburua da harrera etxean aldi baterako egotea, eta familietan baldintza egokiak daudenean bueltatzea». Horregatik, garrantzitsua da nerabeek kontaktua mantentzea familiarekin. «Kasu ezberdinak daude. Batzuetan, asteburuetan elkartzen dira, baldintza batzuk jarrita. Beste batzuetan, horretarako sortutako elkartze guneetan batzen dira, eta hezitzaile baten aurrean gertatzen da familiaren eta umearen arteko harremana».

Itxialdiak iraun bitartean, ez da bisita fisikorik egin. «Ez dugu aparteko arazorik eduki deiak eta bideo deiak egiteko». Izan ere, umeek eguneroko bizitzan egiten zituzten horrelako deiak familiarekin hitz egiteko. Lehenengo fasean, bisitak berreskuratu dituzte.

Elkarbizitzaren erronka

Elkarbizitza ere zaindu behar izan dute, umeak ez baitzeuden ohituta etxean hainbeste ordu egotera. «Guztientzat izan da zaila, baina, beharbada, gazte hauentzat zailagoa izan da». Hala ere, «eramangarria» izan dela azaldu du Gormedinok, batez ere ume taldea aspaldi heldu zelako harrera etxe horretara, eta horrek gauzak erraztu dizkielako. Etxeko hezitzaileek ez dute aparteko aldaketarik egin metodologian; ohi bezala, ideia berriak sortzen ibili dira momentu zailetan aurrera egiteko.

Aldundiak hainbat ekintza proposatu dizkie etxean egiteko; besteak beste, sukaldari famatu baten bisita eduki zuten. «Berrogei egun hauek pasatzeko, aukera berriak eman dizkigute, hori egia da, baina ez dugu nahi Disneyland moduko zeozer irudikatzea. Zaila izan da, profesionalen aldetik eta umeen aldetik ere bai, baina uste dut lantaldea ondo egokitu dela». Hain ezagunak egin diren erronkak eta kirola ere egiten saiatu dira, ume bakoitzaren erritmoak eta guneak errespetatuz.

Aisialdiaz gain, eskolako jarduerak ere etxetik antolatu behar izan dituzte. «Gelako erritmoari jarraitzen saiatu gara, baina ez dut uste posible denik aurtengo curriculuma aurrera eramatea egoera honetan». Umeentzat kontzentratzea oso zaila izan dela nabarmendu du Gormedinok, eta irakasleen eta hezitzaileen lana goraipatu du. «Konpondu gara, ahal izan dugun moduan, etxe askotan bezala».

Eskolako lanekin ere arazoak izan ditu Idoia Altamirak. Donostiako harrera gurasoa da, eta kexu da ez zaielako bilakaera kontrolatu laguntza berezia behar duten umeei. «Kontuan hartu behar dugu ume hauek dituzten arazoek eskolan ere eragiten dietela». Irakasle laguntzailearen irudia desagertu egin dela salatu du Altamirak, eta umeek eskolako erritmoari jarraitzearen pisu guztia haiengan jausi dela. «Zorionez, ohituta nago etxeko lanekin laguntzen, baina, eskolara ez doanez, goiz osoa ematen dut harekin, ikasten jarrai dezan».

«Opari bat»

Guztira sei pertsona bizi dira Altamiraren etxean, eta konfinamenduak familia moduan sendotzeko balio izan diela azaldu du. «Uste dut opari bat izan dela konfinamendua. Umeari familiako kide izatearen sentimendua garatzeko balio izan dio gurekin egoteak».

Harrera etxean eta harrera familian bizipen positiboak izan dira nagusi. «Bizitzako edozein esparrutan bezala, ikasketak egon dira, ziur», ondorioztatu du Gormedinok. Umeak «egoera oso berezietatik» datoz, baina konfinamenduan egondako denbora tarteak pazientzia lantzeko eta beren burua ezagutzeko balio izan diela uste du hezitzaileak. Gainera, Gormendino eta Altamira bat datoz ondorio batean: itxialdiak «taldean hazteko» eta bestearekiko «enpatia» lantzeko balio izan die haurrei.

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Ekainaren 2an eguneratua, 19:00etan. ©BERRIA

Koronabirusaren azken datuak

Berria

Azkeneko 24 orduetan hamar lagun hil dira COVID-19 gaitzaren eraginez. Zortzi positibo atzeman dituzte PCR probekin, eta bost gaixo ospitaleratu dituzte. Euskal Herrian 29.491 gaixok eman dute positibo guztira, koronabirusa atzemateko probaren bat eginda. Horietatik 2.078 hil dira. Grafikoak, albiste barruan.

Maria Txibite, Manu Aierdi eta Elma Saiz kontseilariekin parlamentutik ateratzen. ©Idoia Zabaleta, Foku

Bortzgarren neurri sorta onartu du Nafarroako Parlamentuak

Berria

Navarra Sumaren abstentzioarekin eta bertze alderdi guztien baiezko botoarekin onartu dituzte neurriak. Bertzeak bertze kultura ogibide dutenentzat 50.000 euro arteko diru laguntzak onartu dituzte eta hamabi hilabetez luzatuko dituzte autonomoentzako eta aldi baterako lan erregulazioan daudenentzako alokairua ordaintzeko diru laguntzak. 

Elkarrizketa: Ana Galarraga eta Miren Basaras

«Zabaltzen jarraitu behar dugu ez dakigula benetan zer gertatuko den»

Jakes Goikoetxea

Asko dakite SARS-CoV-2 birusari eta COVID-19aren izurriteari buruz, baina, asko jakinda ere, zuhurtziaz jokatzen dute, ez baitakite zer gertatuko den epe laburrean eta luzera begira.

Behobiako zubia, Irun eta Hendaia artean, itxita. ©Andoni Canellada / Foku

Ekainaren 22an zabalduko dute Ipar eta Hego Euskal Herriaren arteko muga

Jon O. Urain

Reyes Maroto Espainiako Industria ministroak eman du dataren berri. Mugak ia hiru hilabete daramatza itxita, eta horrek eragozpen ugari eragin dizkie eremu horretan bizi diren herritarrei.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna