Albistea entzun

Suteen Aurkako Plana lehen mailara jaitsi dute Nafarroan

Suteek ia 15.000 hektarea erre dituzte, baina agintariek diote egonkortuta daudela. UPNk Nafarroako Gobernuko presidenteordearen dimisioa eskatu du, suteen kudeaketagatik
<b>Larrialdietako langile bat, Uxue inguruko sute batean.</b>
Larrialdietako langile bat, Uxue inguruko sute batean. ANDONI LUBAKI / FOKU Tamaina handiagoan ikusi

Iñaut Matauko Rada -

2022ko ekainak 24

Atzo goizeko zortzietatik, Baso Suteen Larrialdietarako Plana bigarren mailatik lehen mailara jaitsi dute Nafarroan, eta herrialdeko suhiltzaileak bakarrik arituko dira hemendik aurrera suteak guztiz itzaltzen eta kalteak ebaluatzen. Nafarroako Gobernuaren arabera, suteak guztiz egonkortuta eta kontrolpean daude, eta, horiek amaitzeko, azken lanak besterik ez dira falta.

Gauzak horrela, Nafarroako Gobernuaren Larrialdi Zerbitzuek adierazi dute egungo egoerak ez duela «kanpoko laguntza» behar. Euri asko bota du azken egunetan, eta ia guztiz itzalita daude sute guztiak. Orain, suhiltzaileek suteek eragindako kalteak baloratzen jarraitzen dute, baita inguru kaltetuak arakatzen ere.

Guztira ia 15.000 hektarea erre dituzte joan den asteko asteartean piztu ziren suteek. Asteburuko egunak izan ziren zailenak, herrialdeko hainbat tokitan piztu baitziren suak. Legardan erre da soro kopururik handiena, 6.214 hektarea kiskali baitira. Nafarroa erdialdean 5.305 hektarea erre dituzte sugarrek, eta Arguedasen eta Valtierran, berriz, 2.192. Sua piztu zen beste lau tokitan ere guztira 1.000 hektarea baino gehiago erre dira.

Gobernuak suteen kudeaketa «negargarria» egin duela adierazi zuen Javier Esparza UPNko presidenteak, eta Javier Ramirez gobernuko presidenteordearen dimisioa eskatu du. Bestalde, Maria Txibite presidenteak iragarri du uztailaren 4an elkartuko dela suteek jotako udalerrietako alkateekin, kalteen behin-behineko balorazioa egin eta lehengoratze lanean hasteko. Herenegun, Uxue eta inguruko udalerrietako alkateekin elkartu zen, eta «zuhurtzia» eskatu du.

Herenegun Espainiako Gobernuak adierazi zuenez, Babes Zibileko Larrialdi batean Larriki Kaltetutako Eremu izendatuko duela Nafarroa. Aitortza horri esker, inguruen suspertzea bultzatzeko baliabide gehiago izango dituzte, Nafarroako Gobernuaren, Espainiakoaren eta Europako Batasunaren partetik.

San Joan surik gabe

Nafarroako larrialdietako langileek, nekazariek eta herritarrek egun gogorrak pasatu dituzte suteen eraginez. Askok beren lurrak erreta ikusi dituzte, eta beste batzuek sugarrak etxeko atarian izan dituzte. Egoera horren jakitun, Nafarroako hainbat udalerrik San Joan bezperako suak debekatu dituzte; are gehiago, jakinda oraindik ere suteek eragindako kalteak ebaluatzen ari direla larrialdietako langileak. Horrez gain, suarekin zerikusia duten beste hainbat jarduera debekatu dituzte; suzko zezenak, esaterako.

Iruñea, Burlata, Zizur Nagusia, Beriain, Berriozar, Antsoain, Barañain eta Eguesibar dira San Joan bezperako suak debekatu dituzten udalerrietako batzuk.

Trenek piztutako suak

Herenegun arratsaldean, Nafarroako sute nagusiak egonkortuta zeudenean, Nafarroako larrialdi zerbitzuetako alarmak berriro piztu ziren. Izan ere, Nafarroako beste lau lekutan sua piztu zen denbora tarte oso motz batean. Trenek eragindako txinpartek sortu zituzten sute horiek. Larriena Funesen izan zen; 15:15 aldera, nekazariek sua ikusi zuten, eta inguratzen hasi ziren heda ez zedin. Peraltako suhiltzaileak joan ziren itzaltzera, eta 13,6 hektarea erre ziren, Nafarroako Gobernuaren arabera. Alesbesen, Caparroson eta Tuteran piztu ziren, baina berehala itzali zituzten.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Foro Sozial Iraunkorreko koordinatzaile Agus Hernan, atzo, Zaballako espetxean. ©JAIZKI FONTANEDA / FOKU

Foro Sozialak azken bilera egin du EPPK-ko ordezkariekin

Gotzon Hermosilla

Honenbestez, bi aldeek bukatutzat eman dute 2017an irekitako elkarrizketa iraunkorreko etapa. Foro Sozialak esan duenez, EPPK-k ontzat jo du urte hauetako harremana
Gure Esku-ko Josu Etxaburu, atzo, Eusko Legebiltzarrean. ©JAIZKI FONTANEDA / FOKU

Gure Esku-k ekintzetara igarotzeko eskatu dio Eusko Legebiltzarrari

Iosu Alberdi

Elkarteak talde parlamentarioei exijitu die eztabaida «garden eta ireki» bat hasteko, erabakitzeko eskubidea arautzea helburutzat hartuta
Agus Hernan, Zaballako espetxean ©Jaizki Fontaneda / Foku

Foro Sozialak azken bilera egin du EPPK-ko ordezkariekin

Gotzon Hermosilla

Honenbestez, bi aldeek bukatutzat eman dute 2017an irekitako elkarrizketa iraunkorreko etapa

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.