Koronabirusa

Eskolan, etxeko erritmoarekin

Kolegioetako ikasleak ikasgelara itzultzen hasi ziren atzo Ipar Euskal Herrian. Baionako Estitxu Robles Arangiz kolegioan arreta berezia jarri zuten lehen harrera patxadaz egiteko.

Ikasleei eman zieten hitza egunaren hasieran Estitxu Robles Arangiz kolegioan.
Ikasleei eman zieten hitza egunaren hasieran Estitxu Robles Arangiz kolegioan. GUILLAUME FAUVEAU Tamaina handiagoan ikusi

Ekhi Erremundegi Beloki -

2020ko maiatzak 19

Begira, irakasleek ez dute metroa errespetatzen!», «matematikan etxeko lan anitz eman ditu!», «noiz da azken autobusa?». Banan-banan lerroa osatuta, Baionako Estitxu Robles Arangiz kolegiora sartzeko esperoan ziren dozenaka ikasle atzo goizeko 8:00etan. Bi hilabeteko konfinamenduaren ondotik, ez zuten elkarrizketarik falta, eta umore onean ari ziren elkarren artean, Mañolo Espellet zuzendariak kontsignak ematen zituen bitartean. Bi hilabete, asteburu bat izan balira bezala; baina berezia zen atzoko itzulera.

Egun bakoitzeko bi maskara behar dituzte ikasleek; inork ahanzten badu, badituzte batzuk prest kolegioan. Ikasleek bezala, irakasle bakoitzak soinean zeraman berea atzo goizean. Banan bana eskuak gel hidroalkoholikoarekin garbitu, eta ikasgeletara bideratu zituzten, hemendik aitzina egunerokoa bilakatuko den martxari segituz. «Goiza ala egun osoa?» galdetzen zieten, alde batera ala bestera zuzendu aitzin; «zoaz handik, segitu marra». Lurrean, distantziak atxikitzeko marrak, espraiarekin markatuak.

Seigarreneko eta bosgarreneneko 89 ikasleetatik 56 itzuli ziren atzo klasera —maila horretakoen bi herenak, gutxi gorabehera—; Laugarren eta hirugarrenekoak etxean gelditu dira oraingoz. «Momentuko, ez dakigu noiz arte, ez dugu eperik». Hala ere, ez dituzte klase normalak berriz hartuko. Telelanean bezala arituko dira, etxean direnen plangintza berarekin, baina horiek ikasgelan eginen dituzte ematen dizkieten lanak, irakasle baten laguntzarekin. Eguerdian, etxera itzuliko dira gehienak. «Hemendik ateratzean, eskola eguna bukatua izanen dute; ez dute etxera lanik eramanen», esplikatu du Espelletek. Nahi dutenekin eta bestela ezin dutenekin tailerrak eginen dituzte arratsaldez, euskararen erabilpena lantzeko, besteak beste.

Nehor ito gabe

Konfinamendu garaian, hiruzpalau ikasle egon dira kolegioan; osasun langileen seme-alabak. Gainerakoak etxetik aritu dira, irakasleek ematen zizkieten lanak egiten. «Irakasleek sekulako lana egin dute. Lehenik kantitateak eta egin-moldeak berrikusiz, plangintzak osatuz ikasleak ez itotzeko. Goizetik arrats ikasleekin harremanean egon dira, bakoitzarekin banakako lana eginez, sostengua eta azalpenak emanez», kontatu du Espelletek. Oporretan pausa hartu dute denek.

Konfinamendua «aspergarria» gertatu zaiola kontatu du Laurentxek. «Etxeko lanez aparte ez genuen egiteko ezer». Irudimena lantzen aritu da 11 urteko mutikoa: «Ematen zituen ideiak gauzak eraikitzeko, egurrarekin adibidez». Irudimena aipatu du Ibai Aizager hezkuntza aholkulariak ere: «Zaila da eskola bizitza antolatzea, usaiako tresna guziak berriz pentsatu behar baititugu».

Atzokoa «aurre-sartze» baten gisakoa zela esplikatu du Aizagerrek. Gela guziak berriz antolatu behar izan dituzte, eta protokoloak prestatu: harrera, ateratzea, aire hartzeak, komunak, ikasgelak, jangela... «Entseatu gara gogoetatzen ikasle batek nola biziko zuen».

Goizean mintzagune bat antolatu zuten ikasleekin, Seaskako eskola psikologoek lagunduta. «Lehenik, inportantea da sar daitezela protokolo erdi kartzelario-erdi militar horretan; ez dakit nola deitu behar den. Gelan jarririk, eta lasai, zentzua emango diogu egoerari». Ondotik, ikasleei eman nahi izan zieten hitza, izan zitzaketen kezkak eta ezinegonak entzuteko: eskolarekiko larritasunak, programa, berantak... «Uste dut batzuek etxean gurasoen ezinegonak ere jasotzen dituztela», azaldu du Espelletek. «Biziki inportantea da lan hori egitea; Seaskaren pedagogiarekin bat eginez, abegikortasun horri buruz joan nahian, ikasleak dauden lekura joaten saiatuko gara, eta lasaitasunez hartuko ditugu. 'Nola zaudete?', galdetuko diegu. Ez gara hasiko diskurtso alarmistekin; ez dute horrelakoen beharrik».

Espelletek dioenez, guraso batzuei nabari zaie ezinegon hori. Konfinamendu garaian, tutoreek lotura atxiki dute ikasle eta gurasoekin; kasik bi astean behin telefonoz ala bideokonferentziaz dute haien berri: «Uste dut gurasoek eskertu dutela».

Euskara, etxeko erronka

Baionako eta inguruetako ikasleak biltzen dira Estitxu Robles Arangis kolegioan. Euskal hiztunen proportzioa txikia da eremu horretan: «Gure eremua biziki erdalduna da. Bi hilabetez, ikasle batzuek ez dute hitz bat ere entzun euskaraz etxean», esplikatu du Espelletek. Hala ere, Seaskako beste kolegioetan bezainbat euskara entzuten dela dio. «Inplikazio aldetik, gure ikasleek merezimendu handia dute».

Konfinamendu garaian, bideo irrigarri batzuen bidez atxiki dute ikasleekin lotura, Ibai Aizager hezkuntza aholkulariak esplikatu duenez. Ikasleak sorkuntza lanak egitera bultzatu dituzte, izan kantu, bertso, rap... eta lehiaketa gisako batzuk ere egin dituzte puntuaketa sistema bereziekin. «Familiako zenbat eta kide gehiagok parte hartu, orduan eta puntu gehiago lortzen zuten. Ondorioz, familiek ere anitz parte hartu dute. Oharkabean, euskararen erabilpena bultzatu du».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Donostiako Raiundo Berri taberan izan zirenak PCR proba egiteko zain, Okendu kultur etxean gaur goizean. ©Gorka Rubio/FOKU

500 positibotik gora atzeman dituzte Hego Euskal Herrian

Berria

Atzo baino 119 kasu gehiago izan dira. Ospitaleratzeak areagotu egin dira azken orduetan.

Lasarte-Oriako klasururako konbentua itxita, gaur. ©Javier Etxezarreta / EFE

Lasarte-Oriako klausurako komentu bateko moja guztiek positibo eman dute

Berria

Hamar izan dira positiboak guztira. Alkateak adierazi du agerraldia kontrolpean dagoela.

Kutsatze kopuruen azken datuek gora egin dutela ikusita zientzialariak gaineratu du gaitzak “arazo bat” izaten jarraitzen duela. ©Gorka Rubio / FOKU

Bengoak uste du egoera «larria» dela

Aloña Beraza Peña

Ikuskaritza independente bat eskatu dute gertatu dena ikertzeko, egin diren hutsegiteak berriz ere egin ez daitezen, eta aurrera begira ikasteko.

PCR proba egiten gaur, Donostiako Okendo kultur etxean. ©Gorka Rubio/FOKU

Gasteizko Kilimanjaro diskotekan eta Xixilu jatetxean, eta Galdakaoko Muguru tabernan egon zirenei proba egiteko eskatu die Jaurlaritzak

Berria

Gasteizko diskotekan uztailaren 17tik abuztuaren 6ra izan zirenek egin beharko dute testa, eta uztailaren 31tik abuztuaren 4ra jatetxean egondakoek. Galdakaon, tabernan uztailaren 27tik abuztuaren 4ra egon zirenek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna